Re “Lemmwiki Koht Mehlel”

NINDOKEN mehn Israel kan kin sensel nan Isip, sounkeneitik en mehn Ipru Sipra oh Pua kin mihla pahn irair kapwunod ehu. Ni ah song en kamalaulaula mehn liki kan me wie tohtohla, Parao kaweidki lih pwukat: “Ni amwa pahn kin sewese kanaitikih lihen Ipru kan, ma serio ipwidi kisin pwutak, a kumwa kemehla.”​—Eksodus 1:15, 16.

Ahpw, Sipra oh Pua “lemmwiki Koht mehlel,” ihme re eimah oh “sohte peikiong nanmwarkio.” Re kamourala kisin pwutak kan, mendahki wiewia wet kihong ira nan irair keper. Siohwa “kupwurehla sounkeneitik ko,” oh E ketin kapai ira pwehki ara wiewia en kamourala kisin pwutak kan.​—Eksodus 1:17-21.

Ire wet kin kasalehda duwen en Siohwa kin kalahnganki irail kan me kin papah Ih. E kak kilangwohng dahme Sipra oh Pua wiahda, me mendahki eimah, ira wia pwehki re poakehla kisin pwutak kan. Pwehki sohte lih madamadau loalokong men pahn kak kemehla kisin seri kan! Mendahki met, Siohwa, ni mehlel, kin pil medemedewe me mie ekei aramas, me pwehki re masak aramas, re kak wiahda wiewia suwed kan. E ketin mwahngih me lihen kaneitik pwukat kin mwekidki kaidehn ara kadek te ahpw pil pwehki ara lemmwiki Koht oh loalopwoat.

Ia uwen atail kin kalahnganki papah Koht emen me kin pohnese atail wiewia lelepek kan! Mehlel, ele sohte emen rehtail me lelohng kasong en pwoson me kohieng Sipra oh Pua. Ahpw, ni ahnsou me kitail kin tengediong dahme pwung​—ma nan sukuhl, nan atail wasahn doadoahk, de nan irair teikan—​Siohwa sohte kin isanekihla atail limpoak loalopwoat. Me weksang met, E “kin ketin katingih irail kan me kin raparapahki.” (Ipru 11:6) Ehi, “Koht me uhdahn pwung; e sohte pahn ketin meliehla amwail wiewia kan de amwail limpoak ong ih ni sawas me kumwail kasaledahr oh pil kin kasalehiong riamwail souleng kan.”​—Ipru 6:10.