Oupahrekpen Ahnsoun Doadoahk oh Ahnsoun Mwemweit

“AHNSOUN mwemweit kin wia duwehte likou kaselel ehu, ahpw e sohte mwahu en likilikouwi likou wet ahnsou koaros.” Ki mahsen pwukat emen soun nting ni pwung karasahda duwen kesempwal en ahneki ahnsoun mwemweit. Ahpw, e kasalehda, me e anahne en toupahrekihong wiewia katapan kan.

Ire wet pil sansalda sang rehn soun nting sarawi en Paipel, Solomon. Nanmwarki loalokong menet kasawihada soahng riau me kitail en liksang. Keieu, e kasalehda: “Re kin nda me aramas pweipwei men me kin kihpene peh oh mweidala pein ih en dupekla oh mehla.” (Eklesiasdes 4:5) Ehi, dangahnga kak kahreohng emen en semwehmwehla. Imwilahn met, e kak kihong nan keper roson mwahu en me dangahngao, pil ah mour. Ni pali teio, mie irail kan me kin meirongkihla soahng koaros pwehki ahr kin doadoahk. Solomon kasalehda arail doadoahk soh imwi me e rasehng “pwakipwakih kisinieng.”​—Eklesiasdes 4:4.

Ki karepe mwahu, Solomon kasalehda duwen irair en toupahrek. “Ahneki mehkot me tikitik ni kapehd meleilei mwahusang pehmw kan koaros wie kedirepweki rahn koaros songosong en koledi kisinieng.” (Eklesiasdes 4:6) Aramas emen en “kilang kamwahu en ah doadoahk laud”​—met wehwehki me ekei ahnsou en ahneki ahnsou en nsenamwahuki dahme e koadoahkehda. (Eklesiasdes 2:24) Oh mie soahng teikan nan mour likin doadoahk en mwohni. Kitail anahne en kihong atail peneinei atail ahnsou. Solomon kasalehda me keieu en atail pwukoah kaidehn doadoahk en mwohni, ahpw atail papah Koht. (Eklesiasdes 12:13) Komwi iei emen me kin paiekihda ahneki irair en toupahrekpen ahnsoun doadoahk oh ahnsoun mwemweit?