Ahnsou me ‘Melimel kin Lelohng Kitail’

Ni ah kasalehda dahme uhdahn wiawihong sapwellimen Sises tohnpadahk kan nindoken ahr nannanti en kotehla Sehd en Kalili nan pwoht, sounnting en Rongamwahuwo Mark mahsanih me re “pedipedieng oh raraungki ar padil nan leho, pwehki melimel me lelohng irail.” Ni ah ketiket pohn oaroahro, Sises mahsanihada arail irair oh ni manaman alu pohn sehdo pwehn tuhwong irail. Ni “ah ketidahng pohn pwohto iangirailla; ahnsowohte e pa mwelehdi.”​—Mark 6:48-51, New World Translation.

Mark pil ripohtki me ahnsou ehu mwowe, e “ahpw engmahda.” Pwehki met, Sises “angiangihada melimelo, . . . . , Eri, ni ahnsowohte melimelo pa tokedi, ahpw meleileidi kowahlap.”​—Mark 4:37-39.

Mendahki kitail nan rahnpwukat sohte paiekihda en kilang soangen wiewia kapwuriamwei pwukat, kitail kak sukuhlkihsang mehkot laud. Nin duwen aramas sohunsek kan me momour nan ahnsou apwal akan, kitail sohte kin irairdi sang melimel en uhwong kan. (2 Timoty 3:1-5) Ni mehlel, mie pak me kitail kin pehm me pwunod kan me kin kohsang kasongosong me kin lelohng pein kitail me inenen wuk rasehng melimel ehu. Ahpw mie mehn kameleilei kan! Sises ketikihda luhko: “Kumwail kohdo rehi, kumwail koaros me pwangadahr oh toutoukilahr amwail mehn wisik kan. I ahpw pahn kakommoaleikumwailla.”​—Madiu 11:28.

Ni ahnsou me likamwete ‘melimel kin lelohng kitail,’ kitail kak pehm “meleilei” en mohngiong. Iaduwen? Ni atail pahn likih sapwellimen Siohwa Koht inou kan me kin ahnsou koaros pweida.​—Pil kilang Aiseia 55:9-11; Pilipai 4:5-7.