Sounpahr Kesempwal Ehu ong Kohpeseng en Paipel
ARAMAS tohtohsangehr mahso me nainekier Paipel. Ih met me repoht ehu sang United Bible Societies koasoia, pwe kohpeseng en Paipel nan 1998 tohtohkihla sang nan pahr samwalahro elep en rar ehu. Paipel koaros me patpene tohto sang meh 57,200,000—me kawehwehdi pwon de ekeite ire kan me kawehwehdi—me kohpeseng nan sampah pwon. Ripohto koasoia: “Met kin wia mehn kangoang. Aramas tohto aleier Mahsen en Koht rahnwet.”
Ni mehlel, mie wekpeseng en naineki Paipel oh wadek Paipel. Karasepe ehu, ehu roporop kasalehda me tohtohsang persent 90 en mehn Amerika kan kin naineki Paipel, oh pil persent 90 kin kamehlele me Paipel kin wia utupe mwahu en padahkihong aramas tiahk mwakelekel. Ahpw, persentte 59 kin koasoia me re kin sohpeilahng Paipel pwehn ale kaweid. Oh persent 29 wehkada me re “sohte nohn” de “uhdahn sohte” wehwehki Paipel.
Sounkadehdehn Siohwa kan sohte kin ihte ntingihda de kihpeseng Paipel kan ahpw re pil kin wia onop en Paipel ni soh isepe rehn aramas nan sahpw daulih 230. Aramas rar kan nan sampah pwon kin paiekihda koasoandi en sukuhliki Paipel. Re kin ale sawas en powehdi kahpwal akan me re kin lelohng ahnsouwet, oh re kin sukuhliki dahme Paipel kin koasoia duwen ahnsou kohkohdo lingan ehu pahn kaundahn Wehin Koht.—Aiseia 48:17, 18; Madiu 6:9, 10.
[Kilel nan pali 32]
Onop en Paipel kan rehn aramas akan (tepida sang nan kilel powe ni palimeing kohkohla ni palimaun kohdi oh pwureda ni palimeing) nan Bolivia, Ghana, Sri Lanka, oh England