E Pwurehng Kapwurehieng Rihng Kan Nin Sendinpehra

“KILANG sendinpehi kat. Mie mehkot me ke kilang wekila?” Emen ohl kasalehong emen lih peho, lih menet emen Sounkadehdehn Siohwa, me kilang pehn ohlo oh ahnsowohte tehkada me nein ohlo rihng en kapwopwoudo solahr mie ni sendinpeho. Ohlo kawehwehda me ih oh ah pwoudo solahr kin mwahupene, ihme re koasoanehdi me ren mweipeseng. “Soh!” Sounkadehdeo koasoia. “Ale pwuhk wet oh wadek. E pahn sewesehkin uhk omw mouren pwopwoud.” Sounkadehdeho kihong ohlo ehu sawaspen Pwuhk Sarawi me oarelap koasoia Knowledge That Leads to Everlasting Life.a

Rahn kei mwuri ohlo pwurala rehn Sounkadehdeo oh kin peren. E kasalehong sistero peho. Ahnsouwet e doadoahngki nah rihng en kapwopwoudo. E padahkihong sistero me ih oh ah pwoudo wadekehr pwuhken Knowledge oh ahnsouwet ira kin nsenamwahu. Pwuhko uhdahn kapwurehieng rihng kan ni sendinpehra ko.

Kaweid en Paipel kak sewese ohl pwopwoud oh lih pwopwoud en kasalehong emenemen limpoak mehlel. Met kak wiawi pwehki sohte emen me ntingihda Paipel likin Sounkapikpatail, me mahsanih: “Ngehi me Kauno [“Siohwa,” New World Translation] omw Koht, me kupwurki padahkihiuk pwe en wia kamwahu ehu ong uhk oh kaweid uhk nan ahl me ke pahn keid ie.”​—Aiseia 48:17.

[Nting tikitik me mi pah]