Dahme E Loaleidkihda Duwen Kahnimw En New York

SAIN me ke kilang wasaht kin kasansalda pohn ehu imwen doadoahk kan en Watchtower Society nan Brooklyn, New York, sangete nan 1950 samwa. Irail kan me kin kohla doadoahk wasa dohsang imwarail kan, oh tourist kan, oh meteikan me kin keid daulih wasao kin tamanda en wadek Paipel ehuehu rahn. Kisinlikou me sansalda pah, me kohsang rehn emen Sounkadehde serepein pwulopwul, kasalehda lipwalipw en mehn kataman wet.

“I koasoakoasoiaiong emen iengei tohnsukuhl duwen dahme I men wia ni ahnsou me I neksang high school. I tepiada koasoia duwen Bethel, poason kaunen Sounkadehdehn Siohwa kan, oh tohnsukuhlo ahpw perenda. E padahkiohng ie me e kin kousoan nan kahnimw en New York erein ah mour. Eh peneinei sohte kin uhdahn sarawi, ahpw ni menseng koaros ni ahnsou me e kin kilang sang ah wenihmwtok, e kin kilang ehu sain me kin koasoia ‘Wadek Mahsan en Koht Paipel Sarawi Rahn Koaros.’ Ihme kahrehda, rahn koaros e kin wadek nah Paipel mwohn e kohla sukuhl.

“Mwurin ah kosousang nan kahnimwo, e koasoia me mehkot me e loaleidkihda duwen Kahnimw en New York iei me ni ahnsou me e kin pirida ni menseng, e solahr kin kilang mehn katamano en wadek nah Paipel. Ahpw pwehki saino pohn imwen Watchtower, wadewadek Paipel wialahr ahnepe, ihme e pousehlahte kin wadek Paipel rahn koaros!”

Ia uwen e wia ahl mwahu ehu en tepiada ehuehu rahn wadek ehu iren Mahsen en Koht! Ni omw wia met, ke pahn ni mehlel kalahnganki mahsen kan en wahnpoaron Pohl: “Pwuhk Sarawi me kak kasalehiong uhk erpit me kak kahluweiukalahng nan mour soutuk sang ni omw pwoson Krais Sises.”​—2 Timoty 3:15-17.