Ripoht En Sounkalohk Kan En Wehio
“Ke Wehwehki Laud Audepen Paipel”
NI ahnsou me Sises me mahki sounpar 12, ni eimah, e koasoiong kaun en lamalam kan nan Serusalem, “koaros me iang rongorong inenen pwuriamweikihla sapwellime kupwurokong me pwarada ni sapwellime pasapeng kan.” (Luk 2:47) Me duwehte nan rahnwet, sapwellimen Siohwa ladu pwulopwul tohto kin eimah koasoiaiong arail sounpadahk kan en sukuhl oh iengerail tohnsukuhl akan duwen Koht oh Paipel, oh re kalap pehm imwila mwahu kan.
Tiffany, me sounpar 14, kin iang kilahs ehu me re kin koasoia duwen kokohp en Paipel me pid wihk 70 en sounpar kan, me kileledi nan Daniel 9:24-27. Sounpadahko koasoiahda ekei ire kan duwen iretikitik ko oh mwadang oaralapiehda ireo.
Nin tepio, Tiffany ekis pweiek en kauwada peh. E koasoia: “Ahpw, ni mehlel, I nsensuwedki me iretikitik pwukat sohte uhdahn kawehwehda mwahu. Mwadangete, I kauwada pehie.” Sounpadahko pwuriamweikihla me mie emen me uhdahn ese dahme e pahn ndahki oaralapo, pwehki pali moron en tohnsukuhl ko apwaliki wehwehkihla.
Ni en ahnsou mwahu kohieng en kawehwehda kokohpo, Tiffany uhda oh kawehwehda irewet. Ni ahnsou me e kanekehla ah koasoi, sohte me mweseisei nan pereo. Tiffany ekis saloh. Eri tohnsukuhl ko koaros ahpw lopwolopw laudki ih.
“Met inenen kapwuriamwei, Tiffany, met inenen kapwuriamwei,” sounpadahko pwurpwurehng ndinda. Sounpadahko wehkada me mie wehwehn iretikitik pwukat, ahpw Tiffany me tepin kawehwehong ih ni sansal. Mwurin klahso, e idek rehn Tiffany iaduwen e wehwehki laud audepen Paipel.
“Met pwehki ngehi emen Sounkadehdehn Siohwa,” Tiffany sapengki. “Ahi pahpa oh nohno kin kawehwehiong ie kokohp wet pak tohto mwohn ahi wehwehkihla.”
Ienge tohnsukuhl kan pil pwuriamweikihla ah wehwehki Paipel. Emen tohnsukuhl ndaiong Tiffany: “Met I esehdahr kahrepen kumwail Sounkadehdehn Siohwa kan kin kalohk sang ihmw lel ihmw, met pwehki kumwail wehwehki laud audepen Paipel.” Tohnsukuhl teikan inoukihda me re sohla pahn pwurehng kapailokehkin ih dahme e kin kamehlele.
Ni ahnsou me Tiffany padahkihong ah pahpa oh nohno duwen ah ekspiriens, re ndaiong ih en kihong ah sounpadahko pwuhken Knowledge That Leads to Everlasting Life. Ni ahnsou me e wia met oh kasalehong sounpadahko wasao nan pwuhko me kin kawehwehda kokohp en Daniel, sounpadahko perenkihda oh ale pwuhko oh kalahngankihong ih pwuhko.
Ni mehlel, ni ahnsou me Kristian me pwulopwul kan kin ni eimah koasoia dahme arail pahpa oh nohno padahkiohng irail me pid Koht oh Paipel, re kin wahdo kaping oh wahu ong Siohwa oh kapai ong pein irail.—Madiu 21:15, 16.