Erpit en Koht Iaduwen E Kin Sansalda?
“SOHTE emen me medemedewe en ohl semwehmweo eh loalokong de rong dahme e kin nda.” Ki mahsan pwukat, Nanmwarki loalokong Solomon kin kaimwisekla koasoi en emen ohl me semwehmwe ahpw loalokong me doarehla kahnimw ehu sang en mwomwala. Ahpw, kansensuwed pwe “sohte emen me medemedewe duwen ih.”—Eklesiasdes 9:14-16.
Aramas kin kalap mwamwahliki aramas semwehmwe kan, mendahki ma aramas semwehmwe pwukat kin wiahda wiewia mwahu kan. Met kin mehlel rehn Sises. Aiseia kohpada duwen ih: “Kitail mwamwahliki oh sohpeisangehr sohte men kilang; ohlen lokolok men ih me ahnlahr soangen medek koaros.” (Aiseia 53:3) Ekei kin mwamwahliki Sises pwehki e sohte ahneki ndand en kaun en ah mweio. Ahpw, e sapwellimaniki erpit me siklasang loalokong en aramas dipan akan. Aramas kan nan en Sises kousapw sohte men pohnese me nein “kapente ohl” menet kin kasalehda erpit oh kin wiahda soangen manaman kapwuriamwei kan. Ahpw, met sapwung ehu me inenen toutou, pwe Paipel pousehla mahsanih me Sises “sohte wiahda manaman tohto wasao, pwehki ar seupwoson.” Ia uwen aramas pwuko katiasang mehkot mwahu!—Madiu 13:54-58.
Kitail en dehpa wiahda soangen sapwung wet. “Kupwurokong en Koht kin dehdehda sang ni wahn sapwellime doadoahk kan,” Sises mahsanih. Irail ko me kin wia sapwellimen Koht doadoahk oh ketikihda erpit en nanleng kin sansalkihda kaidehn arail ndand rehn aramas, ahpw sang ni “wah mwahu” me re kin kasalehda—arail pwoson oh wiewia kan me poahsoanda pohn Paipel.—Madiu 7:18-20; 11:19.