Ni Ahnsou Me Nennenweite Kin Wehwehki Pwungki
PWUHKO me adaneki Betrayal—German Churches and the Holocaust ni mehlel koasoiahda duwen pwukoahn pelien kaudok nan kaundahn Nazi. “Utungada kaundao kin kalap wiawi nanpwungen Kristian kan,” pwuhko koasoi, oh pali moron en irail sohte uhwong kalokolok en mehn Suhs. Nennenweite, nan irair wet, ni karasaras, kin ngihl laud.”
Dahme kin kamwekid irail kan me dene irail Kristian en pwungki pelien Nazi? Me tohto, nin duwen me pwuhko kawehwehda, kin pitida pahn en Hitler “koasoandi en Sehmen.” E koasoia: “E kin uhwong tiahk suwed, irail kan me kin netiki paliwarail, kemehla seri kan kapehden ine, ohl mwahuki ohl, lih mwahuki lih, oh mahlen kan me kin kasalehda tiahk suwed, oh e kin katingihki lih kan me kin naineki seri pahmen, wenemen, oh walimen, prons, silper, oh kohl metel, pwehn kangoangehkin irail en kapwaiada arail pwukoa nan ihmw. Ire wet kin kaselel ong ahr tiahk, iangahki uhki wehi me Hitler kin kihda pwehn pelianki kanemeneklahn Versailles Treaty, kin kahrehda pelien Nazi en wia mehkot me mwahu ong me tohto, ong Kristian tohto nan Sehmen.”
Mie ehu pwihn me kin weksang douluhl met. “Sounkadehde kan en Siohwa,” pwuhken Betrayal koasoia, “sohte men iang pidada nan peipei kan de iang mahwen.” Pwehki met, e kin kahrehda kalokolok suwed ong kisin pwihn wet, oh tohtohn towe kan kin lekidekiohng nan imweteng kehlail kan. Ahpw, meteikan me dene irail kin idawehn Krais sohte kin sewese kauhdi lokolok pwukat. Pwuhko pousehla koasoia: “Pali lauden mehn Kadolik kan oh mehn Prohs kan kin kasalehda arail kailongki ahpw sohte kin poakehla Sounkadehdehn Siohwa kan, oh re kin iang pwungki koasoandi lemei kan en Hitler laud sang koasoandi meleilei en Sounkadehde kan.” Arail kin nennenweite sohte wia mehkot ni mehlel kin kapataiong wiekau en Sounkadehde kan pahn kaundahn mehn Nazi kan.
Nindoken en pelien kaudok kin iang pidada nan politik en Nazi kan kin pouselahte wia mehn akamai ehu, pwuhko Betrayal kin kahdaneki Sounkadehdehn Siohwa kan “pwihn en kaudok ehu me sohte men utung de ehuong kaundao.”