Popohl Nan Sampah E Kak Wiawi?
POPOHL nan sampah kerendohr? Me tohto mahso kin leme me met pahn wiawi, ahpw ahnsou wet, re kin peikasalkin met. Nin duwen me ripoht ehu me kin koasoia duwen apwal kan en atail ahnsou kohkohdo, me ntingda nan nuhspepa en South Aperika me adaneki Daily Mail & Guardian, “kokohp akan me pid duwen ehu koasoandi en popohl nan sampah pwon me wiawihda sounpahr 10 samwalahro ahnsou wet mwomwen me soahng koaros pahn mwahula.”
Irail akan me ntingihdi met nan pwuhko kin medemedewe duwen koapworopwor mwahu me re ahneki sounpahr eisek samwalahro. Mahwen me re kin kahdaneki “The Cold War” ahpwtehn imwisekla, pingiping me wiawi nanpwungen kaunda kehlail kan en sampah solahr kin wiawi. Ni tepidahn ahnsou kapw ehu, me tohto kasik me tohnsampah pahn tepida apwalihala irail en semwehmwe, soumwahu, oh irair kan me pid pelien nan wehwe, pihl, oh sahpw. Ripohto koasoia: “Kokohp pwuko ahnsou wet mwomwen me soahng koaros pahn unsekla. Mahwen kapw kan kin wiawihda nan wasa kan me se ahpwtehn esehda me wasa pwukat mih nan sampah; semwehmwe me kin mih wasa koaros nin sampah pousehlahte wie kekeirada. Mie wehi kehlail riau me kin wiahda kepwehn mahwen me wiawihkihda nuclear. Eden UN uhdahn suwedkihla ah sohte itar en sewesehda kahpwal akan en aramas akan. Irair wet mwekid sangehr irair en mour unsek ong mour soh unsek.”
Irail me kin sukuhliki Paipel kin pohnese me en aramas nannanti, mendahki ia uwen mwahu, sohte kak uhdahn pweida. Pwekihda? Pwehki, nin duwen me Paipel mahsanih: “sampah unsek mih pahn manaman en Me Suwedo.” (1 Sohn 5:19) Nin doken e mih pahn kaundahn Sehdan, sampah sohte kak wiahla irairen paradais nin duwen me Koht kapikada en wia.
Ni ahnsouwohte, mir kahrepen kitail en ahneki lamalam me soahng koaros pahn mwahula. Siohwa Koht ketin inoukihda me e pahn wahdo popohl nan sampah, kaidehn ihte kamwahuwihala koasoandi suwed wet, ahpw e pahn wahdo “sampah kapw ehu” wasa me “pwung pahn poadada ie poatopoat.” (2 Piter 3:13) Ehi, pwehki Wehin Koht, atail sampah pahn wekila wiahla wasahn kousoan ehu me popohl, oh peren pahn mie, wasa me mour oh doadoahk pahn kaukaule wia mehkot kaperen ong tohnsampah peik koaros. Pil ehu, Koht ketin inoukihda me e pahn ketin “limwihasang pilen masarail koaros. Mehla sohla pahn wiawi, solahr mwahiei, solahr nsensuwed, solahr medek. Soahng mering kan sohralahr.” Inou pwukat sohte kin poahsoanda pohn kokohp soh tengeteng kan. Ahpw, re poahsoanda pohn Mahsen en Sounkapikpatail, me sohte kin ketin likamw.—Kaudiahl 21:4; Taitus 1:2.