Lingan En Mas Loale Kin Kak Mihmi Werei

“MWAHNAKAPW KAN KIN KALAP KARASAIONG LINGAN EN MAS LIKI DUWEHTE LINGAN EN MAS LOALE,” KOASOIA EMEN KRISTIAN LELEPEK MAH.

Ehi, ong ahnsou reirei, aramas kin kesempwaliki lingan en mas liki oh pak tohto met kin kahrehda arail kasawihada loalen emen kin sapwung. Ahpw, Sounkapikpatail kin mahsanih loaletail, mendahki ia mwomwetail ni pali liki. Ni ahl wet, e wiahda mehn kahlemeng me keieu mwahu en emen me ese kasawihada aramas. Nin duwen me Paipel kasalehda, pein Koht mahsanih: “I sohte kin kasawih aramas nin duwen me aramas akan kin wia. Aramas kin kasawih mwomwen aramas, ahpw ngehi, I kin kasawih nan mohngiong en aramas akan.”​—1 Samuel 16:7.

Koht kin wia utupen lingan mehlel en aramas oh sapwellime Mahsen kin kasalehda me ni ahnsou me e kin kasawih mehlel en aramas emen, e kin keieu kesempwaliki irair en pali ngehn en aramas akan. Paipel mahsanih: “Poh komwokomw me widingan, oh lingan kin sohrala, ahpw lih emen me kin lemmwiki Kauno [“Siohwa,” New World Translation] uhdahn pahn ndandla.” (Lepin Padahk 31:30) Mehlel, kaselel en mas liki kak ekihla suwed en mas loale. (Ester 1:10-12; Lepin Padahk 11:22) Mendahki lingan en paliwar pahn sohla ni ahnsou me emen mahla, lingan en mas loale​—irair kan en mohngiong—​kak kekeirada oh mihmi werei.

Ihme kahrehda, e kin wia elen loalokong en kekeirada soangen irair kan me duwehte limpoak, peren, popohl, kanengamah, kadek, kamwahu, pwoson, opampap oh liksang me suwed! (Kalesia 5:22, 23) Eri, kitail kak alehda lingan en loale, me pahn mihmi werei.​—1 Piter 3:3, 4.