Pei en Powehdi Irair en Semwehmwe—Pei ieu me Aramas Sohte Kak Kana?
TOURIST kan me kin mwemweitla United Nations nan kahnimw en New York City kin kilangada pahn pwelengen ihmwo nan wasao me adaneki “Economic and Social Council Chamber” paip akan me sohte pinapinla. Sounkaweid en tourist kan kin kawehwehda: “Pwelengen ihmw wet me ‘sohte kaneknekla’ kin wia mwomwen mehn karasaras en kataman me doadoahk en sewese aramas me United Nations kin wia sohte kin nekla; ahnsou koaros pahn mie mehkot me kak wiawi pwehn kamwahuwihala irair en mour en aramas akan en sampah.”
Mendahki Councilo inoukihda en wiahda doadoahk kan me katepe ni a kin kangoange irair en mour ile ong koaros, doadoahko kin mwomwen sohte kak nekla. Erein ahnsou me Sises Krais kin kalohk nan sampah nan keieun senturi C.E., e mahsanih: “Ngehnen Kauno [“Siohwa,” New World Translation] ketier reh, e ketin keieiehdier pwe I en kapahrengkihong me semwehmwe kan rongamwahu.” (Luk 4:18) “Rongamwahu” dahieu me e lohkihseli? Rohng wet kin pid Wehio me Siohwa Koht, me wiahla “imwen ruk ong me semwehmwe kan ni . . . apwal,” pahn kauwada rehn Sises Krais nin duwen Nanmwarki. Dahme Wehio pahn wia? Aiseia kohpada: “Kauno [“Siohwa,” NW], Wasa Lapalap pahn ketin kaunopada kamadipw ehu ong wehi koaros nin sampah—kamadipw ehu me pahn direkihla kisin sak keieu kaselel oh wain keieu iou. Kauno [“Siohwa,” NW], Wasa Lapalahpie pahn ketin kamwomwala mehla kohkohlahte!”—Aiseia 25:4-6, 8.
Ke men sukuhliki iaduwen Wehin Koht pahn “kamwahuwihala irair en mour en aramas en sampah,” eri aramas solahr pahn anahne mehkot? Kilang pah pwehn sukuhliki iaduwen emen sounpadahk koahiek kak pwarek rehmw pwehn kasalehong uhk dahme Paipel mahsanihki ire pwukat.