Pelien Lamalam Kak Wahdo Meleilei Ong Sampah?
SANG August 28 lel August 31, 2000, tohto sang wiliepen wehi 500 sang wehi 73 pokonpene nan kahnimw en New York. Re pokondohng United Nations ong mihding kan me re pahn koasoia duwen oaralap wet: “Pahr Kid en Popohl en Sampah oh Kaun akan en Pelien Kaudok oh Palien Ngehn.” Kaun pwukat—ekei irail doadoahngki soangen likou kan oh mehn kapwat kan duwehte turbans, likou puhp me saffron-colored, feather headdresses, oh pil likou puhp me reirei oh tohntoal—oh re wiliwilian pelien lamalam tohto. Nanpwungarail iei irail me iang pelien lamalam en Baha’i, Buddhism, Hinduism, Islam, Jainism, Judaism, Shinto, Sikhism, Taoism, Zoroastrianism, oh pelien lamalam en Kristendom.
Kaun pwukat tuhpene ni United Nations ong tepin rahn riau en mihding en rahn pahieu. Ahpw, kaidehn United Nations me koasoanehdi de pwain mihdingo ahpw soangsoangen pwihn teikan me wia met. Mendahki met, United Nations oh iangahki kaun en lamalam kan kin koasoiapene duwen kesempwalpen ren doadoahkpene pwehn kauhdi semwehmwe, lipilipilki wehi teikan, kahpwal me pid tuhke, pihl, sahpw, mahwen oh kepwehn mahwen kan.
Kaun pwukat sainihla ehu doaropwe me oaralap koasoia: “Commitment to Global Peace” (“Se Inoukihda me Se Pahn Doadoahkpene Pwehn Wahdo Popohl Nan Sampah”). Nin doken doaropwe wet kin pohnese me pepei oh mahwen “kin ekei pak wiawihda ni eden pelien lamalam,” doaropwe wet kasalehda me irail ko me sainihla doaropweo pahn miniminiong United Nations . . . pwehn wahdo popohl.” Ahpw, sohte ire oaretik kan ong iaduwen kamwahula pwukat pahn wiawi.
Ni rahn keriau, Bawa Jain, Secretary-General en mihdingo, kaimwisekla ah koasoi kan ni ah kawehwehda me sounpahr kei mwowe, e tehkada ehu mahlen ni United Nations. Mahleno kin kasalehda duwen emen ohl me reireisang imwen United Nations Secretariat. E wie letelet pohn ihmwo likamwete wenihmw ehu mwo. Pahnangin kilelo iei nting ko: “Soupeidi en Popohl.” Mr. Jain koasoia: “[Kilelo] kamwekidiehda laud ni ahnsou me I kilangada. I kin idek rehn soangsoangen aramas akan ia wehwehn kilelo. I lemeleme rahnwet I eseier pasapengo. Kumwail koaros me pokonpene wasaht, kaun en palien ngehn oh kaudok en sampah, kasalehong ie me [met] iei Soupeidi en Popohl me wie letelet pohn wenihmw en United Nations.”
Paipel kin kasalehda lamalam ehu me weksang met. Paipel kin kasalehda me Soupeidi en Popohl iei Sises Krais. E pahn wahdo popohl nan sampah pwon, kaidehn ki doadoahk kan en kaun akan en pelien politik de kaun akan en pelien lamalam en sampah wet, ahpw sang ni Wehin Koht. Wehi wet—Wehin Koht (sapwellimen Koht koperment nanleng)—me pahn pweida ni ah pahn kaminiminpene tohnsampah peik kan oh kahrehda kupwuren Koht en wiawi nan sampah.—Aiseia 9:6; Madiu 6:9, 10.