Ke Kin “Isaneki Ahnsou Mwahu Koaros”?
WAHNPOARON POHL kaweidki Kristian kan nan keieun senturi: “Eri, kumwail kanahieng duwen amwail mour me kumwail weweidki. Kumwail dehr duwehte aramas me loalopwon kan, ahpw kumwail duwehte me loalokong kan. Kumwail isaneki ahnsou mwahu koaros, pwe ahnsou pwukat ahnsou suwed kei.” (Episos 5:15, 16) Dahme kahrehda kaweid wet konehngki? Kitail anahne wehwehkihla irair kan me Kristian kan nan kahnimw en mahso mihla pah pwehn sapengla peideko.
Episos kin ndandki ah kepwehpwe, tiahk samin, dirki mwersuwed, oh soangsoangen wiewiahn wunahni kan. Patehngete met, Kristian kan wasao anahne en peiong padahk en aramas akan me pid ahnsou. Mehn Krihk kan me kaidehn Kristian nan Episos sohte kin kamehlele me ahnsou kin mwekimwekidwei inen. Padahk en mehn Krihk kan kin padahkiong irail me mour en aramas sohte kin tokedi ahpw kin pwurepwurehng. Aramas emen me kin kesehla mwahl ah ahnsou nan ehu mour kak pwurehng alehda ahnsowo me e kesehla nan pil ehu mour. Soangen madamadau wet kak kahrehong Kristian mehn Episos kan en alehda madamadau en sohla kin nohn kesempwaliki sapwellimen Siohwa koasoandi en ahnsou kan, iangahki sapwellime ahnsoun wia kadeik. Ihme kahrehda, en Pohl kaweid en ‘isaneki ahnsou mwahu’ kin konehng.
Pohl sohte kin ihte koasoia ahnsou sohte lipilipil. Lepin lokaiahn Krihk me e doadoahngki kin wehwehkiong ahnsou ehu me kileledi ong kahrepe de doadoahk tohrohr ehu. Pohl kin kaweidiki Kristian kan nan keieun senturi en doadoahngki ni erpit ahnsou mwahu kan, de ahnsoun irair mwahu, me re ahpwtehn paiekihda, mwohn e pahn imwisekla oh kalahngan en Koht oh komour pahn sohla.—Rom 13:11-13; 1 Deselonika 5:6-11.
Kitail kin momour ni ahnsou mwahu ehu me rasehng met. Kristian akan en dehr kesehla mwahl ahnsou mwahu wet me sohte pahn pwurehng wiawi ni atail pahn rapahki mehn kamweit mwotomwot kan me sampah wet kin kihda, ahpw Kristian kan kin loalokong ma re kin doadoahngki ahnsou me re ahneki en wiahki “doadoahk en loalopwot ong Koht” oh eri kakehlailla arail nanpwung mwahu rehn Sounkapikpatail, Siohwa Koht.—2 Piter 3:11; Melkahka 73:28; Pilipai 1:10.