Wia Onop Paipel Doadoahk Wet Konehng Uhk?

“SOHTE mweimwei en wadek pwuhk wet ma emen samworo sohte mih rehmw.” Kaweid wet pwarada nan ekei Paipel kan me Kahdolik kan kin naineki. Kay Murdy me doadoahk nan Catholic Bible Institute nan Los Angeles koasoia met, “Nin duwen Kahdolik kan, kiht sohte kin, sangete ahnsou werei, wehwehki duwen audepen Paipel kan, ahpw ni ahnsou wet, irair wet wekila.” Ni ahnsou me tohn mwomwohdiso kan en Kahdolik kin wehwehki me Pwuhk Sarawi pahn kak sewese irail, e koasoia me “irail kin pein kekeirada arail kin men ese audepen Paipel.”

Makisihn en U.S. Catholic kin koasoia duwen wekidekla wet ni e koasoia dahme emen sounpadahk en pelien lamalam koasoiahki duwen tohnmwomwohdiso kan en Kahdolik me kin onop Paipel kin lemeleme me “nin duwen Kahdolik kan, re sohte kin ale kasukuhl duwen Paipel, oh kapai en pali ngehn laud me mih nan Paipel. Irail men pil ale kapai pwukat me re lemeleme irail saikinte alehdi.”

Ahpw, “kapai ni pali ngehn” dah kei emen tohnsukuhl en Paipel pahn kak diarada? Tehk duwen met: Ke men ese iaduwen ke kak powehdi kahpwal kan en mour ehu ehu rahn? Iaduwen ke kak kolokolete popohl oh peren nanpwungen tohnpeneinei kan? Dahme kahrehda aramas tohto kin kasalehda tiahk lemei oh men kelehpwla? Dahme kahrehda me pwulopwul kan nan rahnpwukat kin lemei? Pasepeng pwung kan ong peidek pwukat oh pil peidek apwal teikan pahn kak dierekda nan sapwellimen Koht Mahsen, Paipel, oh “kapai ni pali ngehn” pwukat pahn kak kohwong kaidehn ihte tohn pelien lamalam Kahdolik kan de Prohs, ahpw pil ong irail me iangala pelien lamalam Buddhists, Hindus, Muslims, Shintoists, oh pil aramas akan me sohte kin kamehlele me mie Koht oh irail akan me kin peikasal me mie Koht. Nin duwen sounmelkahkao mahsanih, ‘Sapwellimomwi mahsen, iei serepei, mehn kaweid ie, oh kamarainpen elei kan.’ E kak pil wia met ong uhk.​—Melkahka 119:105.