“Iaduwen—Koht Kin Uhdahn Keriahla Aramas Akan Pwehn Isihs Nan Ehl?”
“Kumwa kin ale kasukuhl en Pwuhk Sarawi?”
Joel oh Carl inenen pwuriamweikihla peidek wet me kohwong ira. Mwahnakapw riemen wet kin toukihda ara ahnsou ni soh pweipwei oh iang wie doadoahk nan poasen kaun en Sounkadehdehn Siohwa kan nan Brooklyn, New York oh ira kilikilangseli pwuhk kei nan sidohwa ieu. Ni Joel ah kilikilang pwuhk ehu me pid duwen Pwuhk Sarawi (Bible concordance), Carl koasoakoasoiong ih duwen aramas emen me e tuhwong nan kalohk oh dahme re koasoiapene. Ohl emen kesihnen limwara eri rongada ekis audepen ara koasoi oh ih eri peidek rehra.
Ohl menet ahneki iren peidek me laud sang ese ma mwahnakapw riemen kin sukuhl en Paipel. E kawehwehda koasoia: “Ngehi emen mehn Suhs men, oh ekei kompoakepai Kristian kan kin ndaiong ie me I pahn isihs nan kisiniei en ehl pwehki mehn Suhs soikala Sises. Met kin kapwunodei ie. Soangen kalokolok wet en kohsang rehn Koht limpoak emen sohte pwung. Iaduwen—Koht kin uhdahn keriahla aramas akan pwehn isihs nan ehl?”
Joel oh Carl ndaiong ohlo me ira kin wia tohnsukuhl kei me kin inenen kesempwaliki Paipel. Ira kasalehong ih sang nan Paipel me irail me melahr akan sohte kehn wasa oh wie memeir nan irair en mehla oh awiawih kaiasada. Kahrehda, irail sohte kak pehm lokolok de pil kamedek en lehn kisiniei. (Melkahka 146:3, 4; Eklesiasdes 9:5, 10; Daniel 12:13; Sohn 11:11-14, 23-26) Mwurin ara koasoiong ohlo minit 45, ohlo kihong Joel oh Carl nah adres oh peki rehra ma re kak sewese ih en ale kalaudpen ire wet.
Ma ehl kin wia wasahn kalokolok nan kisiniei, mie aramas men me pahn pekihda en kohla wasao? Ohl lelepek, Sohp, peki en kohla nan ehl pwehn pitsang ah apwal akan oh mahsanih: “Ihs me pahn ketikihong ie met, pwe komw en kak pere ie nan ehl, oh wie rukuruk lao sapwellimomwi engieng en uhdi?” (Sohp 14:13, Douay Version) E sansal me Sohp sohte wiahki me ehl kin wia wasahn kalokolok oh kamedek. Ni mehlel, e rapahki perepe wasao. Mehla kin wia irair en sohla mie douluhl, oh ehl me Paipel kin koasoia kin wehwehki sousou en aramas.
Ma ke men ale kalaudpen wehwe duwen dahme wiawi ong aramas ahnsoun mehla oh koapworopwor dahieu me mie mwurin mehla, ke lukedohng e mwekidki luhk wet.