Ripoht En Sounkalohk Kan En Wehio

Koht Ketin Limwihasang Pilen Mese

ARAMAS akan me arail mour kin pahrekiong sapwellimen Siohwa kosonned akan oh elen kaweid akan kin ale kapai laud. Edetehn wiahda wekideklahn mour ong dahme konehng kin wia mehkot apwal, sawas oh kangoang kin tohto. (Melkahka 84:11) Ekspiriens wet me kohsang Eisia kin kasalehda mwahu ire wet.

Ahnsou me emen Sounkadehde (sister en Prans men) wia mwemweit en kommoal sang doadoahk, e koasoi ong emen lih me ede Kima (me kin ahneki sidohwa ieu) duwen sapwellimen Siohwa koasoandi ong sampah. Sistero pil kihong Kim pwuhk ieu me oaralap koasoia Ke Kak Mour Kohkohlahte Nan Paradais Nin Sampah. Kim eri ale pwuhko oh wie papahkseli oh kilangada wasakis me koasoia, “E pahn kin ketin limwihasang pilen masarail koaros.” (Kaudiahl 21:⁠4) Kim eri tamanda eh pepehm ahnsowo oh koasoia: “Ire wet inenen sair ie. Aramas akan kin kilang ie mwomwen pereperen rahn ehu pwon nan sidohwa, ahpw ihs me kak ese me ni ahi kin lel imweio ni soutik, I kin sengiseng lao ngehi meirla?” Ih eri wehkada kahrepen met oh koasoia: “Ni erein sounpahr 18, I kin koukousoan rehn emen ohl, ahpw I kin inenen nsensuwed pwe e kahng pwoudikin ie. I men kohkohsang ih ahpw pwehki I pil poakepoahehlahr ih, I sohte kakasang.”

Ahnsou kis mwuri, Kim tepida onop Paipel rehn emen Sounkadehde (sister men) me ede Linh. Kim koasoia: “I kin ngoangki kapwaiada soahng kan me I sukuhliki nan Paipel. Karasepe ieu, I sohla kin kaudokiong kisehi me melahr akan, mendahki kisehi kan kin uhwong ie. Oh pil, I song kapwungala ahi pwopwoud oh ohl me I kin mihmi reh kahng. Nan erein ahnsou apwal wet, Sounkadehde sang Prans sohte uhdihsang kadakadarodo sawaspen Paipel kan rehi, oh Linh kin wia mehn kangoang laud ong ie. Kanengamah oh utuht limpoak me sister pwukat sewesehkin ie kahrehong ahi tengeteng lao ngehi diarada ia uhdahn mehlel duwen ohl me I mihmi reh. I diarada me e pwoudikiher lih limen mwohi oh nah seri 25! Met kihong ie lamalam kehlail pwehn kak kohkohsang ih.

“Kousoan nan ihmw laud oh kansenamwahu, oh uhd mihla nan apartment tikitik sohte mengei ong ie. Oh pil, ohlo pil pwurehng idingkin ie I en pwurala reh, oh kamasangkin ie me e pahn wudekihong acid (kemikel kehlail me kak kauwehla paliwar en aramas) pohn paliwerei oh kauwehla ie ma I sohte pahn pwurala reh. Ki sapwellimen Siohwa sawas, iei me I kak wiahki dahme pwung.” Kim eri kekeirada oh eri papidaisla nan April 1998. Oh pil, rie serepein riemen oh pil nah pwutak teenager men tepida onop Paipel rehn Sounkadehdehn Siohwa kan.

Kim koasoia: “I kin kalap lemeleme mahs me ahi mour pahn suwed kohkohlahte. Ahpw rahnwet, I wia aramas peren, oh I solahr kin sengiseng ni pwong kan. Siohwa ketin limwihasang pilen mesei kan.”

[Nting tikitik me mi pah]