Ahneki Madamadau en Kalahngan oh Peren

“EHU nuhspepa en Canada me adaneki Calgary Herald koasoia: “Mwekidki kalahngan kin wia poahsoanpen mwekid en aramas.” Nuhso pil koasoia duwen ekei seri me sounpahr duwau me iang elementary sukuhl me arail sounpadahk ndaiong irail en ntingihdi soahng koaros me re kin kalahnganki. Emen pwutak pwulopwul nda me e kin kalahnganki eh peneinei ‘pwehki irail kin apwalih ih.’ Emen serepein pwulopwul pil kin kalahnganki eh peneinei, oh nda: “Irail kin pere ie, kihong ie en kehlail ni war, apwalih ie, poakohng ie, kamwenge ie, oh pwehki ahi pahpa oh nohno, I wie memour rahnwet.”

Ma aramas emen sohte ahneki madamadau en kalahngan, e kin kalap nsensuwed. Nin duwen ohl loalokong, J. I. Packer, koasoia: “kitail kepikpikda pwehn kehliki Koht oh kehliki emen emen kitail.” Met kin katamandohng kitail kaweid erpit en Paipel me kohda pahr epwiki kei samwalahro me mahsanih: “Kasalehda me ke kin kalahnganki dahme meteikan kin wia ong uhk.” (Kolose 3:15) Kasalepen kalahngan oh kaping ong meteikan kin sewese kitail en wiahda nanpwung mwahu rehrail.

Laudsang met, sang ni atail kin kalahnganki oh kesempwaliki meteikan, kitail pil kin kasalehda me kitail kin kalahnganki dahme Siohwa kin wia ong kitail, oh Siohwa kin mwahngih met. Paipel mahsanih: “[Siohwa] kin ketin mwasamwasahn sampah pwon, pwehn ketin kakehlahda irail kan me arail mohngiong kin loalopwoat ohng ih.” (2 Kronikel 16:9) Koht katamankin kitail me e kin tamataman oh kupwurperenki limpoak me aramas kin kasalehong mware. (Ipru 6:10) Ehi, mie kahrepe mwahu me kitail en kasalehda kalahngan pwehki irair en Koht wet, ni atail kin kasalehda rahn koaros, kin kaperenda Siohwa oh pil kin kahrehdohng kitail peren. Pil duwehte me Lepin Padahk 15:13 mahsanih: “Mohngiong peren kin wahdo poh marahra.”