Sounkauwehla Tuhke kan

NAN ahnsou kan en mwehin Paipel, tuhke kan kin wia mehkot kesempwal. Karasepe ieu, ni ahnsou me Eipraam pwainda wasahkis ohng wasahn sousou ohng eh werek kompoak, Sara, tuhke kan pil wadawadi en iang wia kisehn pweipwei en sahpwo.​—Senesis 23:15-​18.

Pil duwehte rahnwet, tuhke kan wia mehkot kesempwal, oh sampah pwon kin tetehk ren dehr kamwomwala wahl akan. Pwuhk me ede State of the World 1998 koasoia: “Mendahki aramas tohto me kin kousoan nan wehi kan me mih paliepeng kin kilang wahl akan nan wasa karakar akan oh poakehla pwe irail dehpa ohla, irail sehse me tuhke kan ni mparail akan me keieu malaulau peseng, oh mwadang sohsohla sang soangen wahl teikan.” Eri, dahme kin kaukauwehla wahl akan nan wehi kan en paliepeng en Iurop oh North America? Aramas tohto koasoia me pal tuhke ong wia ihmw me kahrehdahr, ahpw mie pil soahng teikan me sohte sansal ahpw wie kaukauwehla tuhke kan, ehu ehu teh de pil ehu ehu pohns. Soahng dah kan kin wia met? Samin en nan wehwe oh keteu me dol wini suwed (acid rain). Soangen kasamin pwukat kin ekis ekis kaluwetihala mour en tuhke kan, oh kahrehong arail mengei en alehdi soumwahu en tuhke.

Sounpahr tohto kei, aramas en palien environment oh aramas teikan ale me keperpen me irail anahne apwalih toupahrek en mour nan sampah. Nan pahr 1980 kan, mwurin saintis en Sehmen kan tehkehr duwen mour nan sampah oh saminlahn nan wehwe oh keteu dol samin akan, irail nda: ‘Ma sohte mehkot pahn wiawi lel nan pahr 2000, aramas akan pahn kak tamanda lingan en wahl akan nan kilel oh kilel mwekid kante.’ Ahpw, kitail meid pai pwe pein kehl tohrohr me pwelen sampah ahneki pwe e pein kawose oh winie pein ih, kahrehdahr wahl akan pwurehng kamwahuwihala wasa tohto me ohlahr.

Ahpw, ni mehlel, ihte Koht me kak kapwurehdo irair toupahrek nan sampah me wia utuht penehn mour akan. “E [Koht] kin ketin kamwerehdi keteu pohn nahna kan sang nanleng” oh “kin ketin kawosadahng mahn kerep akan, oh ong aramas wahntuhke oh werentuhke.” Oh E ketin inoukihda “en kauwehla irail kan me kin kauwehla sampah.” (Melkahka 104:13, 14; Kaudiahl 11:18) Ia uwen a nohn kaselel ahnsou me tohnsampah pahn kakehr nsenamwahuki kohkohlahte sampah ieu me sohte samin!​—Melkahka 37:9-​11.