Erpit Ni Pein Arail Ahl Tohrohr
“ARAMAS laud mie arail erpit, ahpw seri kan kin erpit ni pein arail ahl tohrohr.” Met kin wia lepin padahk nan Nigeria. Emen Kristian elder nan Nigeria me ede Edwin diar me met me mehlel.
Ehu rahn, Edwin diar kohpwa mete ieu pahn ah tehpel en nting.
Ih eri idek rehn nah seri silimeno: “Nein ihs me?”
A Emmanuel, nah seri me sounpahr waluh, nda: “Nei.” Ih pil mwadangete kapataiong me kohpwa mete me merlahr oh uwe mihmi ni ins limau oh mie kisin pwoahr ehu powe ah mehn wia sawas ong doadoahk en kalohk me Sounkadehdehn Siohwa kan kin wia sampah pwon. E kawehwe me: “Pwehki I sohte kin kohla Kingdom Hall rahn koaros, eri I lemehda wiahda kohpwa ieu pwe luhwen mwohni koaros me I sohte pwain kenei mwenge I kak kesehdiong loale.”
Mie pil nein ahn Emmanuel pahpa nah kisin kohpwa ieu nan imwarailo mehn nekid mwohni en iang towehda Kapokon en District nan ehu ehu pahr. Ahpw, pwehki ahn peneinei anahn kin pwarada ahnsou kan oh karuwaru, irail kin pil doadoahngkihla mwohnio. Ahpw, pwehki Emmanuel sohte men irair wet en wiawi ong nah mwohni kan, e wahla tehn pwoaht kei rehn soun inimpene mete men pwehn inimpene. Ni ohlo (soun inimpene mete men) ah diarada mehnda met, e kihpene luwen mete kehlail ekei oh wiahda nein Emmanuel. Rien Emmanuel pwutak me sounpahr 5, Michael, pil peki nah ehu.
Edwin pwuriamweikihla dahme seri ko wiahda, ih eri idek rehra mehnda rehra kohpwa mete pwukat. Michael sapeng, nda: “I men wia ahi sawas en meirong!”
Edwin oh ah pwoud sehse me neira seri kan: Emmanuel, Michael, oh Uchei, neira serepein me sounpahr 9, kin nekinekidpene luhwen neirail mwohni en mwengehn souwas nan kohpwa ko. Iawasa re esehsang ie wia met? Ni ahnsou me seri kan ekis laudla oh kakehr kol mwohni, arail pahpa oh nohno kin padahkiong irail en kesehiong mwohni nan kohpwa en sawas me mih nan Kingdom Hall. E sansal me seri kan koledi mwahu mehn kasukuhl wet.
Ahnsou me kohpwa ko dirala irail eri lopukpeseng. Mwohni me mihmi loale: $3.13 (U.S.)—met mwohni laud nan sahpw me pweinen aramas emen nan pahr ehu kin mpen $300 (U.S.). Soangen sawas duwehte met kin sewese doadoahk en kalohk en Sounkadehdehn Siohwa kan nan sampah pwon nan sahpw 235.