Doadoahk Mwahu kin Kalinganahda Koht
SANG ni arail wiewia mwahu oh mehn kahlemeng en doadoahk mwahu kan, Kristian mehlel kan kin kalinganahda Koht. (1 Piter 2:12) Met kak sansal sang dahme wiawi nan Italy nan pahr ekei me kerendo.
Nan September 1997, rerrer en sahpw laud ehu lel ekei wasa nan Marche oh wasa kan nan Umbria oh kauwehla ihmw kereniong 90,000. Pwihn en Sounkadehdehn Siohwa kan mwadangete kihda sawas ohng iengerail me pwoson akan oh pil irail aramas teikan. Irail wahla trailer kan, mehn wendi kan, stove kan, misihn en liohl kan, oh pil dipwisou anahn teikan. Aramas akan kin tehk duwen elen sawas pwukat oh kapingki.
Nuhspepa me ede Il Centro ripohtki: “Me tepin aramas akan me lelodo oh wahdo sawas ong wasa kan me ohla iei irail Sounkadehdehn Siohwa kan en Roseto [nan province en Teramo] . . . Likin arail kin kaukaule wia mihding oh kapakap, irail me lelepek ong Siohwa kin sewese irail me paiohkila apwal, oh sohte kin lipilipilki mehnia pelien lamalam me re iang.”
Mayor en Nocera Umbra, ehu kahnimw me ohla laud, ntingihalahr Sounkadehde kan: “I kalahnganki sang nan mohngiong oh sang pein ngehi pwehki sawas me kumwail kihong tohn Nocera. I kamehlele me I koasoiki pepehm tohn wasaht koaros.” Kapataiong met, Palien Interior kihong Congregazione Cristiana dei Testimoni di Geova (me wehwehki Mwomwohdiso en Kristian en Sounkadehdehn Siohwa kan) kisinlikou en kaping pwehn “kadehde duwen doadoahk mwahu me wiawihong irair karuwaru ieu me pwaradohng nan Umbria oh wasa kan nan Marche.”
Nan October 2000, lapake laud ehu wia Piedmont ni palieir en Italy me kauwehla wasao. Sounkadehdehn Siohwa kan mwadangete kohla wasao oh kihda sawas. Doadoahk mwahu pwukat—aramas akan pil perenki. Piedmont Region pil kihda kisakis en kaping me nting nan tuhke pwehki arail “kihda doadoahk en sawas kesempwal ong towe kan en Piedmont me ohkihla lapake.”
Sises Krais kaweidiki sapwellime wahnpoaron oko: “Amwail marain en daker aramas akan, pwe irail en kak kilang amwail doadoahk mwahu kan oh kapingahki Samamwail me ketiket nanleng.” (Madiu 5:16) Sounkadehdehn Siohwa kan, ni peren, kin kapinga Koht, a kaidehn ong pein irail, sang ni arail kin wia “doadoahk mwahu kan” me kin sewese pali ngehn oh ni ahl teikan en mehn mparail kan.