Mie Pein Arail Loalokong
EHU lepin padahk en Nigeria koasoia: “Aramas laud kin loalokong, ahpw seri kan pil mie pein arail loalokong.” Edwin, emen elder nan mwomwohdiso en Sounkadehdehn Siohwa kan nan Nigeria, diarada me met mehlel.
Ehu rahn, Edwin diarada kisin koakon mete ehu pahn eh tehpelo.
Ih eri idek rehn nah seri silimeno: “Nein ihs met?”
Nah me sounpar 8 me adaneki Emmanuel sapeng: “Nei men.” E pil mwadangete nda me e kin doadoahngki pwehn kihpene mwohni ong doadoahk en Sounkadehdehn Siohwa kan nan sampah pwon. Kisin koakono merla oh e tehlapki oh ilehki ins 5 oh mie kisin pwoahr me wiawihda powe. E koasoia: “Pwehki I sohte kin kohla nan atail Wasahn Kaudok rahn koaros, I wiahda koakono pwe ma I sohte pahn pwainda kenei kirahka, I pahn ale mwohnio oh kihdi loale.”
Eh pahpao pil naineki koakon ehu mehn nekidala mwohni ong kapokon me irail pahn iang. Ahpw pwehki mie kahpwal ehu me pwarada nan peneinei, irail doadoahngkihla mwohnio. Emmanuel eri wahla tehn pwoaht ehu rehn souninim mete men pwehn kak inimpene tehn pwoahto pwe irail en sohte kak kieisang mwohni ong ehu soahng tohrohr. Ni en souninim meteo esehda kahrepen tehn pwoahto pahn inihnpene, e ahpw ale luhwen mete kei oh inimpene kisin koakon ehu ong Emmanuel. Rien Emmanuel me adaneki Michael me sounpar 5 pil pekihda en naineki ehu koakon.
Edwin pwuriamweikihla dahme seri ko wia oh idek rehrail dahme kahrehda re wiahkihda koakon pwukat. Michael sapeng: “I men kihda ei sawas!”
Mendahki arail pahpa oh nohno sohte ese, Emmanuel, Michael, oh Uchei, riara serepeino me sounpar 9, kin nekinekid neirail mwohni ong kenerail kirahka oh kihdi nan kisin koakon kan. Ihs me padahkihong irail en wia met? Ahnsou me re ekis laudla oh kakehr koledi mwohni nan pehrail, arail pahpa oh nohno kin padahkihong irail en kihdi mwohni nan koakon en meirong nan arail Wasahn Kaudok. Eri e sansal me seri ko kin kapwaiada dahme re sukuhlkihdi.
Ahnsou me koakon ko dirala, re pwalangpeseng. Uwen mwohni me re nekidala $3.13. Met kaidehn mwohni tikitik ehu nan arail wasa pwehki pali laud en tohndoadoahk kan kin ale $300 nan ehu sounpar. Soangen sawas duwehte met kin sewese doadoahk en Sounkadehdehn Siohwa kan nan sahpw 235.