Ia Pweinen en Wie Kolokol Nsen Mwakelekel?

“KOPERMENT Ruwese en Ale R$20,000.” Nuhs kapwuriamwei wet pwarada ahnsou keren nan nuhspepa en Brazil me ede Correio do Povo. Artikel wet koasoia duwen emen ohl me ah doadoahk iei wahseli kisinlikou me ede Luiz Alvo de Araújo, me netikihla pelien sahpw kis ong koperment. Mwurin ah sain kisinlikou en netlahn sahpwo, Luiz inenen pwuriamwei me re pwainiki ih R$20,000 (mpen $8,000, U.S.) laudsang pweipwei me re inoukihong nin tepio!

Luiz uhdahn men kapwurehla mwohnio, ahpw e apwal en wia. Mwurin Luiz wie pwurepwurehki ohpis en koperment kan oh sohte pweida, kaweid kohwong ih en pwainda nah lawyer oh koasoanehdi kahpwalo nan mwoalen kopwung. Sounkopwungo me ruwese koperment en ale mwohnio oh pil pwain pweinen sounsawaso koasoia: “E sansal me aramas emen wiadahr sapwung ehu, oh pwehki kahpwal kan, sohte me ese iaduwen ar pahn kapwungala. Ehdin soangen case wet ahi kilang.”

Luiz, emen Sounkadehdehn Siohwa, kawehwehda: “Ahi nsen mwakelekel, me kin mwekidki kaweid sang nan Paipel, sohte mweidohng ie en ale mehkot me kaidehn nei. Kahrehda, I nantihong kapwurehla mwohni wet.”

Aramas tohto sohte kak wehwehki duwen madamadau duwe met. Ahpw, Mahsen en Koht kasalehda me Kristian mehlel kin kesempwaliki en kolokol nsen mwakelekel ni arail kin ehuiong kaunen wehi kan (koperment). (Rom 13:5) Sounkadehdehn Siohwa kan kin uhdahn loal kehlail en ‘kolokol mehlel en kadeikpen loalerail (nsen mwakelekel) oh arail wiewia ni mehkoaros.’​—Ipru 13:18.