Saikinte Mahla ong Ale Sukuhl
KSENIYA ipwidi nan pahr 1897. Nah serepein 3, pwutak emen, seri dih kesiluh 15, oh seri dih kapahieu 25. Erein ah mour, e kin wia dahme ah pahpa oh nohno padahkiong ih en wia. Edetehn e kohdo nan Moscow repen saledek sang mahwen me wiawi nan Abkhaz Republic, wasahkis me mih nanpwungen Black Sea oh Caucasus, e inenen itarki ah mour, ahpw ni mehlel dahme e kahdaneki ah sohso en pwoson me sang rehn a keinek en mahs oko.
Nan 1993, nein Kseniya serepein, Meri, wiahla emen Sounkadehdehn Siohwa. Meri eri tepiada koasoiaiong Kseniya duwen Siohwa Koht oh Paipel, ahpw e sohte mwahuki rong. Kseniya kin ndaiong nah serepeino, “E pwandalahr ien pwurehng sukuhliki mehkot kapw.”
Ahpw, nah serepein, Meri; oh ahn nah seri nah pwutak ah pwoud (grandson’s wife), Londa; oh nah seri dih kapahieu Nana oh Zaza, koaros irail Sounkadehdehn Siohwa kan, nannantihongete koasoiaiong ih duwen Paipel. Ni soutik ehu nan pahr 1999, irail wadek iren Paipel ehu me sair mohngiong en Kseniya. Iren Paipel wet kasalehda duwen mahsen en Sises ahnsou me e padahkiong sapwellime wahnpoaron lelepek kan iaduwen ren wia Saken Soutik en Kauno. (Luk 22:19, 20) Ni a sounpahr 102, ni soutiko Kseniya koasoanehdi me e pahn tepida onop Paipel.
Kseniya koasoia: “Mwurin ahi mourikihier sounpahr 102, I ahpw wehwehkihda wehwehn mour. I diaradahr me sohte mehkot mwahu sang papah Koht mwahu oh limpoak, Siohwa. Ahi kataman oh paliwereiet kehlail. I sohte anahne doadoahngki kilahs ni ahi kin wadawad oh I kin kalap iang dahme ahi peneinei kin wia.”
Nan November 5, 2000, Kseniya eri papidaisla. E koasoia: “Met I toukihda ahi mour ong Siohwa en papah Ih ni limpoak. I kin kihseli makisihn oh tract kan ni ahi kin mwomwohd nan wasahn awih bus me karanih imweio. Ahi peneinei kan kin kalap kohdo mwemweitdo rehi, oh I kin perenki ehukihong irail duwen padahk mehlel me pid duwen Siohwa.”
Kseniya kin kasikasik ahnsou kohkohdo me ‘uduk pahn kapw sang irair en me pwulopwul, oh e pahn pwuralahng ah kehl en pwulopwul.’ (Sohp 33:25, New World Translation) Ma aramas likeilapalahr menet sohte pepehm me e nohn mah ong sukuhliki duwen wehwehn mour sang nan Paipel, a iaduwen komwi?