Iahd Me E Pahn Loalokong En Tang

RAHNWET, sampah kin kalap sansalki ngenen mwomwehda kommwad oh lemei oh pil kasongosong. Ma aramas emen pahn tangasang mehpwukat, aramas teikan pahn wiahki ih aramas luwet oh masepwehk. E pil kak wiahla mehn kouruhr.

Ahpw, Paipel kadehdehda me mie ahnsou kei me tangawei sang ekei irair kan de aramas akan de wasa kan pahn wia elen loalokong. Pwehn kadehde mehlel en mahsen en Paipel wet, mwohn Sises Krais a kadarpeseng sapwellime tohnpadahk kan, e mahsanih ong irail: “Ma re kaloke kumwail nan ehu kahnimw, a kumwail tangalahng nan ehu kahnimw tohrohr.” (Madiu 10:23, NW) Ei, sapwellimen Sises tohnpadahk kan kin song en tangasang irail me kin kaloke irail. Irail sohte kin song en wiahla pwihn en mahwen pwehn song en alehdi iengerail ni idihd. Irail kin wah mahsen en popohl. (Madiu 10:11-​14; Wiewia 10:34-​37) Kristian akan sohte men wia mehkot mehn wiahda lingeringer, ahpw irail kin tang pwe irail en kin dohwanewei sang kansensuwed akan. Ni ahl wet, irail kin kolokol kadeikpen loale mwahu, oh irail kak pil kolokol nanpwung mwahu rehn Siohwa.​—2 Korint 4:1, 2.

Karasepe ieu me weksang met dierek nan Paipel pwuhken Lepin Padahk. E mahsanih duwen mwahnakapw men me sohte tangasang kasongosong, ahpw e pwakihada lihen netiki paliwere “duwehte kouwol emen me kohwong kamakamala.” Ia imwi? Paisuwed lelohng ih pwehki e lohdi pahn kasongosongo oh kauwehla pein eh mour.​—Lepin Padahk 7:5-8, 21-​23.

Eri, iaduwen ma ke lelohng kasongosong ieu me pahn kahluwaiukalahng en wia dipen nenek de lelohng kasongosong keper teikan? Nin duwen dahme Mahsen en Koht kasalehda, e pahn mwahu en tangeweisang, pwe ken kadohwanewei sang uhk wasao ni ahnsou mwadang.​—Lepin Padahk 4:14, 15; 1 Korint 6:18; 2 Timoty 2:22.