Ke Kin Kalahnganki Sapwellimen Koht Limpoak?

MAHS, ohl men me adaneki Sohp kawehwe duwen irair en aramas soh unsek ni mahsen pwukat: “Kitail koaros ipwidi luwet. Aramas koaros ahneki soangen mourteieu me mwotomwot oh diren apwal. Kitail kin keirda oh mengidi, rasehng wahnrohs kan; kitail kin sohrala duwehte mwete.” (Sohp 14:1, 2) Nin duwen me Sohp ese, mour kin diren kapwunod oh pahtou. Mie pak me ke kin ahneki pepehm wet?

Sohte lipilipil soangen kahpwal dah me kitail kin lelohng, koapworopwor kaselel ieu mie, koapworopwor ieu me poasoankihda pohn sapwellimen Koht limpoak. Keieu, Samatail nanleng me diren mahk ketikihda meirong pwehn kapitasang aramas nan kanaudok en dihp. Duwen me Sohn 3:16, 17 kasalehda, Sises Krais mahsanih: “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk. Pwe Koht sohte ketin poaronedohng nin sampah Sapwellime Iehros pwe en kadeikada sampah, a pwe en komourala.”

Pil tehk sapwellimen Koht madamadau kadek ong kitail aramas soh unsek. Wahnpoaron Pohl mahsanih: “E ketin wiahda kadaudok koaros sang rehn ohl tehmen, oh ketikihong irail en koukousoan pohn sampah pwon. Pein ih me koasoanehdier mwohn mehkoaros pwungen ahnsou kan oh irair en wasa kan me re pahn koukousoan ie. E ketin wiadahr met pwe re en rapahki ih, oh mwein re pahn diar ni ar pahn rapahki. Ahpw, Koht sohte dohsang emenemen kitail.” (Wiewia 17:26, 27) Nna, song medewehla ia wehwehn met ong kitail! Edetehn kitail aramas soh unsek, kitail pil kakete paiekihda irair en nanpwung mwahu rehn Sounkapikpatail limpoak, Siohwa Koht.

Eri, kitail kak koapworopwor oh kilangwohng rahn akan me kohkohdo, ni atail ese me Koht kin ketin nsenohkin kitail oh ni limpoak ketikihong kitail dahme pahn wia kamwahupatail kohkohlahte. (1 Piter 5:7; 2 Piter 3:13) Eri, mie kahrepe laud ong kitail me kahrehda kitail en kalaudehla sukuhliki duwen atail Koht limpoak ni atail pahn onopiki sapwellime Mahsen, iei Paipel.