“Komwi Lih Mwahu Men”

Mahsen kaping pwukat kohwong emen lihen Mohap pwulopwul men. Ih emen liohdi me ede Rud, oh ih me pwoudki nein lihen Israel me ede Naomi nah pwutak. Rud memour nan Israel sounpahr 3000 samwa samwalahro, ahnsou me sounkopwung kan kin wie kopwung me pwung ong mehn Israel kan, oh Rud ahneki adamwahu nin duwen lih mwahu men. (Rud 3:11) Iaduwen e ahneki adamwahu wet? Ihs pahn kak paiekihda mehn kahlemeng mwahu me e wiahda?

E sansal me Rud sohte kin kang “pilawa en dangahnga,” pwe e kin pwerisek oh kin doadoahk awa tohto nin duwen sounrik kadok en parli, oh aramas koaros kin kak kapinga ih pwehki eh pwerisek. Oh pil, ahnsou me re song en katikitikala eh doadoahk, e kin doadoahk laudte, oh pil kin wia laud sang dahme e anahne wia. E kasalehda ni sansal me e wia lih pwopwoud koahiek, pwerisek oh warohng adamwahu nin duwen dahme Pwuhk Sarawi kasalehda.​—Lepin Padahk 31:10-​31; Rud 2:7, 15-​17.

Ahpw, ni mehlel, ahn Rud irair en pali ngehn​—⁠lamalam aktikitik, ngehn en tohnmetei, limpoak oh lelepek​—⁠irair pwukat kahrehda aramas teikan kin kapinga oh wauneki ih. E kohkohsang eh pahpa oh nohno oh pil uhdakeo, oh sohte ahneki koapworopwor laud me e pahn kak diar nsenamwahu me kin kohsang pwopwoud, ahpw mendahki mehpwukat, e sohte men kohkohsang Naomi. Ni ahnsowohte, Rud pil kasalehda me e men papah Siohwa, Koht me Naomi kin pil papah. Pwehn kasalehda kesempwalpen Rud oh ah irair kan, Pwuhk Sarawi mahsanih me e “mwahu sang pwutak isimen ong Naomi.”​—Rud 1:16, 17; 2:11, 12; 4:15.

Ahpw, edetehn Rud kin adamwahu nanpwungen aramas, dahme kesempwal sang met iei me Koht kin kupwurki eh irair mwahu kan oh ketikihong ih pwais kaselel pwe e wia nohno kahlap en Sises Krais. (Madiu 1:5; 1 Piter 3:4) Rud wia mehn kahlemeng mwahu kaidehn ihte ong lih Kristian kan ahpw pil ong aramas koaros me kin papah Siohwa!