Mehn Kasukuhl Sang Rehn Menpihr Stork
“PIL stork me kin pihr nanleng—kin ese ahnsou me re pahn pwuralahng nan dewerail . . . Ahpw, kumwail nei aramas akan, sohte ese kosonned kan me I kihong kumwail.” (Seremaia 8:7, NW) Ki mahsen pwukat, soukohp Seremaia pakairki duwen sapwellimen Siohwa kadeik ohng irail aramas lahlahwe kan nan Suda, irail oko me kesehla Siohwa oh uhd kaudokiong koht en likih kan. (Seremaia 7:18, 31) Dahme kahrehda Seremaia pilada menpihr stork en wia mehn kasukuhl ong irail mehn Suhs salelepek kan?
Ohng mehn Israel akan, menpihr stork, ahpw mehlel me poh pwetepwet akan, kin kalap pihrih nan sahpw akan me adarail sansal nan Paipel. Eden mahn kalaimwun, neh reirei menet ni lokaiahn Ipru kin wia eden lih me kin wehwehki “ih me lelepek; oh kin limpoak oh kadek.” Ahd wet me konehng, weksang pali laud en menpihr kan pwe stork pwetepwet ohl oh lih kin pwopwoudda oh sohte kin mweipeseng erein mour. Mwurin arail kin rapahkihda wasa karakar nan sounpwong lemwulemwur kan, irail me kin pwurodo ohng pahsohte me re doadoahngki nan pahr en mwowe kan pwe ren pwurehng kutohr.
Mwekid en stork kan kin pil wia kilelepen lelepek ni pil ahl teikan. Menpihr me ohl oh lih kan kin komkompwal neira kutohr akan oh pil kin sawaspene kamwenge neira kisin mahn me kasawahier akan. Pwuhk me oaralap koasoia Our Magnificent Wildlife kawehwe me: “Pahpa oh nohno en stork kan kin inenen lelepekpene. Stork ohl emen nan Germany pihr oh tengala nan selin liohl kei oh mehla. Ah pwoudo uhd kelepw komkompwalih neira kutohr oko erein rahn 3, oh ih eri pihrila sang ni pahso pak ehute en ale mwenge kisin ahnsou kis. . . . Nan pil ehu irair, stork liho kesikihdi oh mehla oh ah pwoudo uhd apwalihada neira kisin seri kelepw.”
Ni mehlel, sang ni mwekid en lelepek ong oh werek erein mour oh pil epwel keneinei ong wahrail akan, kasalehda me stork kan kin kapwaiada wehwehn adarail akan—“ih me lelepek.” Kahrehda, stork wia mehn kasukuhl kaselel ong aramas en Israel me soh pwoson oh salelepek kan.
Ohng aramas tohto nan rahnwet, uhpah mehlel oh lelepek wia mehkot me aramas kapinga ahpw sohte kin wia pwe dene kaidehn ihme aramas en ahnsou wet kin wia. Paralahn mweipeseng en pwopwoud, kesehla seri kan, pirap oh soangen irair en mwersuwedih aramas teikan kin kasalehda me lelepek solahr kesempwal rehn aramas akan. Ahpw, weksang met, Paipel kin kasalehda me lelepek inenen kesempwal oh e kin kohsang ni limpoak oh kadek. E kin kangoangehki Kristian kan en “onehda sapahl pein irail ong ni aramas kapw me wiawihda rasehng Koht, oh me kin kasalehda pein ih ni mour mehlel en pwung oh sarawi.” (Episos 4:24) Ei, irair en aramas kapw kin sewese kitail en lelepekpene, oh kitail pil kak sukuhliki mehn kasukuhl me pid mehlel oh lelepek me kitail kilang rehn menpihr stork.