‘Mahkong Mehteikan’
KE kin kamehlele me Koht kin ketin mahkong dipomw kan? Nan wehin United States, aramas laud kereniong koaros kamehlele met. Dr. Loren Toussaint, me wia roporop ieu nan University of Michigan Institute for Social Research kasalehda me nanpwungen mehn Amerika 1,423, mpen persent 80 en aramas laud me pohnangin sounpar 45 nda me Koht ketin mahkongehr diparail kan.
Ahpw, e kapwuriamwei en ese me persent 57 te nda me irail kin mahkong aramas teikan. Nempe pwukat kin kataman ong kitail mahsen en Sises ko ni ah wia sapwellime Padahk Pohn Dohlo: “Pwe ma kumwail pahn mahkikihong meteikan sapwung kan me re wiahiong kumwail, nahn Samamwail me ketiket nanleng pahn pil ketin mahkikihong kumwail dipamwail kan. A ma kumwail sohte pahn mahkikihong meteikan ar sapwung kan ong kumwail, eri, Samwail me ketiket nanleng pil sohte pahn ketin mahkikihong kumwail sapwung kan me kumwail kin wiahda.” (Madiu 6:14, 15) Ei, sapwellimen Koht mahkpen dipatail akan kin pil pidada me kin pil mahkong mehteikan.
Wahnpoaron Pohl katamanki Kristian akan nan Kolose iren madamadau kesempwal wet. E kangoangehkin irail: “Kumwail en sawaspene oh mahkpene nanpwungamwail, ni emen rehmwail eh pahn kin kaulime emen. Kumwail uhdahn pahn mahkpene nanpwungamwail, nin duwen Kauno eh ketin mahkohngkumwailehr.” (Kolose 3:13) Mehlel, met kaidehn mehkot mengei. Karasepe, aramas emen wia lokaia lemei ong uhk, e sohte mengei ken mahkong aramaso.
Dr. David R. Williams, sociologist men, koasoia duwen roporop me e wiahda: “Se diarada ni mehlel me rehn aramas me palan akan oh likeilapalahr akan nan Amerika irail me kin mahkiong sapwung de dipen aramas teikan kin ahneki irair en roson mwahu en palien madamadau.” Met kin pahrekiong mahsen en Nanmwarki erpit Solomon, me ntingihdi sounpar 3,000 samwalahro ko: “Nan kapehd meleilei kin karosonehda paliwar, ahpw luwak kin rasehng soumwahu suwed.” (Lepin Padahk 14:30) Pwehki ngehn mahk a kin wiahda nanpwungmwahu ong Koht oh mehn mpatail kan, e wia kahrepe mwahu ieu kitail en kin mengei en mahkong emenemen ni saledek oh sang mongiongatail.—Madiu 18:35.