Aramas Koaros Kin Men Ale Kaping

Rahno wia rahn kansenamwahu ieu ong kisin serepeinkis. Edetehn e kin anahne kaweid ekei ahnsou, ahpw rahno e inenen tiahk mwahu. Ni pwong, mwurin ahn kisin serepeino ah nohno ah kameirla ih, oh nohno rongala ah wie sengiseng. Ni ah idek dahme e sengisengki pilen mese ko kerekeredi ahpw idek: “Ngehi serepein mwahu rahnwet?”

Peideko lopuk nan kapehden ah nohno duwehte naip pwoat. Ahnsou koaros e kin mwadang lipwoar pwehn kapwungala nah serepein. Ahpw rahno, mendahki serepeino a wia uwen ah kak koaros en wia seri mwahu, ah nohno sohte pohnese oh pil ndahte ehu lepin lokaia me kasalehda me e perenki dahme e wia.

Serepein tikitik kan kaidehn irail kelepw me anahne kaping oh kakehlepen kapehdirail. Kitail koaros pil anahne​—e pil duwehte atail kin anahne ale kaweid oh mehn kapwungala atail wiewia.

Ia atail pepehm ahnsou me mehteikan kin kapinga kitail? Mwein kitail kin pehm me aramas akan tetehk kitail, oh nsenohki kitail. E kin kamehlelehiong kitail me dahme kitail kin wia mehkot katapan, oh e kin kangoange kitail en wia me mwahu, oh kitail pil men pwurehng wia met mwuhr. E sohte kapwuriamwei me kaping mehlel kin kakaranihpene madamadau en aramas me kin mie arail ahnsou en nda mehkot me kaperen ong meteikan.​—Lepin Padahk 15:23.

Sises Krais wehwehki anahnepen kapinga mehteikan. Nan a karasaras en ladu me ale mwohni, soumaso (kin karasaiong Sises) kihda kaping mwahu ong emenemen meh riemen me lelepek ko, e mahsanih: “Doadoahk mwahu kowe ladu mwahu oh lelepek!” Ia wen kaperen! Mendahte ah wekpeseng ara koahiek oh wen doadoahk me ira wiahda kaping me kohieng ira duwepenehte.​—Madiu 25:19-​23.

Kahrehda kitail en tamataman ahn serepeino ah nohno. Kitail sohte anahne aramas teikan lao sengisengiong kitail ah kitail ahpw pahn kapinga irail. Soh, kitail en rapahki irair akan me kitail kak isaniki oh wia kaping. Ni mehlel mie kahrepe mwahu me kahrehda kitail en kaping ni ahnsou mwahu koaros.