Nantihong en Ahneki Mour Mwahu oh Pwung

Ni imwin pahr 2001, irail akan me rongorong radio en Mozambique’s National Broadcast rongada pakair wet:

“President en Republic wet mwemweitlahr ni imwen Branch Ohpis en Sounkadehdehn Siohwa kan nan Maputo. E kangoange mwomwohdiso wet en kakehlailla arail nanti en ahneki mour mwahu nanpwungen peneinei kan oh nan arail prokram en kasukuhlih aramas akan en esehla wadawad oh nting. Mpen aramas 10,000 kei me paiekihda sang prokram pwukat. Nin duwen dahme President Chissano koasoia, prokram pwukat anahne kaping en kohwong pwehki irail inenen wia kamwahu kan ong tohnsahpw oko, ni arail kin sewese kamwahuwihala kahpwal en kasukuhl kan me wehio kin lelohng.”

Pakair wet pil doula oh kasalehda sapwellimen Presidento kapahreko me mahsanih: “E inenen wia mehn kangoang ong kitail en kilang me irail me tohto me kin perenki esehla wadawad oh nting. E kin kasalehong kitail me irail tohn wehi pwukat pahn sewese kitail en kalaudehla persent en irail me ese wadawad oh nting. Ihme kahrehda, I men kangoange irail Sounkadehdehn Siohwa kan en kalaudehla arail prokram en kasukuhliki nting oh wadawad ni sohte lipilipil lokaia dah me keieu kesempwal iei me aramas pahn ese wadawad oh nting oh e pahn mengei ong irail en wehwehpene nanpwungarail oh ni ahnsou kohkohdo, tohto me pahn kak iang sukuhl.”

Sounkadehdehn Siohwa kan nan Mozambique kin kihda kasukuhl en wadawad oh nting nan wasa 850 nan sahpwo pwe aramas akan en kak pein wadek Mahsen en Koht. Patehng met, irail kin onop Paipel rehn aramas 50,000 nan ehuehu wihk. Mehpwukat koaros kisehn kasukuhl en Paipel me kin wiawi sampah pwon nan sahpw 235. (Madiu 24:14) Ke pil kak paiekihda prokram wet. Menlau saledek en tuhwong Sounkadehdehn Siohwa kan nan ahmw wasa.