Ahnsou Keieu Mwahu en Memour

AHNSOU me ke kin lelohng kasongosong kan, ke kin men pwuralahng “rahn mwahu kan en mahs”? Nna, medewehla mahsen pwukat en Nanmwarki Solomon: “Ke dehr idek: ‘Dahme ahnsou samwalahr ako mwahukihsang rahn pwukat?’ Met kaidehn peidek en aramas loalokong.”​—Eklesiasdes 7:10.

Dahme kahrehda Solomon ketikihda kaweid wet? Pwehki e wehwehki met: ma ke pahn kilangwong soahng kan en mahs ni pwungih eri ke pahn kakong irair kansensuwed kan en rahnwet. Irail akan me kin men pwuralahng “rahn mwahu kan en mahs” ele kak manokehla me mahs pil mie kahpwal akan en mour oh mour sohte uhdahn unsek mahs. Mwein ekei soahng kan en mahs mwahu sang met, ahpw, ekei soh. Nin duwen me Solomon ntingihdi, e sohte loalokong emen en pwuralahng de medemedewe mehkan en mahs pwehki e sansal me kitail sohte kak pwuralahng soahng kan me wiawiher mahs.

Mie kasuwedpen de kahpwal kan me pahn kohsang en atail men pwuralahng mahs? Ei, ma e pahn kahrehong kitail en sohte materek ong de sohte kak soanamwahu nan ahnsou wet de e kin kahrehong kitail en sohte kak kalahnganki ahnsou me kitail mihmi loale met oh koapworopwor me kitail kak ahneki.

Ni mehlel, met iei ahnsou keieu mwahu ong kitail en memour, mendahki lalaudlahn kahpwal kan rahnwet. Pwekihda? Pwehki kitail kerenlahngehr pweidahn sapwellimen Koht koasoandi kan me pid sampah wet oh kapai kan me pahn kohsang sapwellime kaunda me meleilei. Paipel inoukihdi: “E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.” (Kaudiahl 21:4) Ni ahnsou me irair en sampah pahn mwahula, solahr kahrepen emen men pwuralahng “rahn mwahu kan en mahs.”