Ni Tehpel en Kapdino
ARAMAS akan me meteikan kin men esehla, mwenge iou, oh koasoi kaperen kan: mehpwukat me kin kahrehda mwenge ni tehpel en kapdin pohn sohp inenen kaperen. Ahpw, koasoakoasoipene me wiawi ni tehpel en Kapdin Robert G. Smith, Kapdin en Sohp me ede “White Star Line,” kin kasalehda kamadipw en pali ngehn ehu.—Aiseia 25:6.
Nan pahr 1894, ni e mahkier sounpahr 24, Robert wiahla kapdin en sohp me adaneki Kinclune of Dundee oh irail pahn tepin pidahki sampah pohn sohpo. Mwuhr, e uhd wiahla kapdin en sohp kan en “White Star,” duwehte Cedric, Cevic, oh Runic.a Ni e kotkote sehd en Atlantic sang New York ong Liverpool, England, pohn ehu sohp pwukat, e tuhwong emen ohl me adaneki Charles Taze Russell me iang konot ni tehpel en kapdin menet. Ni e koasoakoasoiong Russell, tepida perenkihda padahk en Pwuhk Sarawi oh pwehki e men kalaudehla ah wehwehki duwehte met, e ale pwuhk ehu sang rehn Russell me adaneki Studies in the Scriptures.
Russell kin koasoakoasoiongete ih sang ni e kin nting ong ih oh pwehki ara kin ntingpene, en Robert perenki padahk en Pwuhk Sarawi laudla. Robert eri ehukihong eh pwoudo soahng koaros me e kin sukuhliki. Sohte pwand, ira koaros eri wiahla kisehn irail Bible Student kehlail kan me met uhd adaneki Sounkadehdehn Siohwa kan. Mwuhr, Robert e uhd alehdi pwais mwahu en padahki duwen Paipel. Karasepe, nan Brisbane, Australia, e koasoi duwen “The Balm of Gilead” oh kasalehda iaduwen sapwellimen Koht Mahsen kan kin audaudki padahk me kak “kamwahuwihala kahpwal kan koaros en sampah.” Nan England, ah pwoud oh nah seri kan sewese ih oh kasalehda “Photo-Drama of Creation,” oh kin kasalehda kawehwe kan me Russell wiahda ni ehuehu slide kan.
Robert kihong nah seri kan sohso en padahk mehlel me e alehdiero. Rahnwet, leledohr dih kalimau, irail meh 18 me kisehn en Robert peneinei pil kin kedirepwki ehukihong mehteikan Rongamwahu oh kin kalahnganki dahme kohda ni tehpel en kapdin.
Ki neirail pwuhk kan oh arail doadoahk en kasukuhliki duwen Paipel, irail Sounkadehdehn Siohwa kan kin sewese aramas akan sampah pwon en wehwehkihla padahk kan en Paipel me kamwekidada Kapdin Smith. Ke kak pil diarada dahme nohn kaperen en esehla ni tehpel en kapdino.
[Nting tikitik me mi pahs]
a Pil ehu sohp, Titanic, me Kapdin E. J. Smith kin ruwese, sohte pweida pwehki ohlahn sohp wet.
[Kilel nan Pali 8]
Robert G. Smith
[Kilel nan Pali 8]
Charles T. Russell