“I Diarada Mehkoaros Me I Anahne”

IRAIR en pahtou oh solahr ahneki koapworopwor nin duwen ripoht ehu sang World Health Organization kasalehda, irair kendoh me irair wet sairadahr mour en aramas pohnangin million 120 nan sampah pwon. Nan ehu ehu pahr, aramas million kin kemehla pein irail oh nanpwungen aramas million 10 lel 20 kin song lusiam pwe irail en irehdi arail mour. Soangen sawas dah me mie ong irail akan me kin loalohla? Sawas en imwen wini ele kak katikala kamedeko, oh utuht en palien pepehm wia mehkot kesempwal. Ahpw, ekei me kin lelohng soangen kahpwal en pepehm wet kin diar sawas kapatapat sang kaweid en Paipel sang Sounkadehdehn Siohwa kan, nin duwen kisin likou wet sang France kasalehda.

“Ahnsou kerendo ieu, I solahr kak kilang kahrepen wie momour. I kapakapkihong Koht en ketin mweidohng ie ien mehla. Pwe likamwete I mehlahr nan loaleiet. Sang ni repen kaweid, I kapakap ngidingid ong Siohwa. I pil lemehdahr ien wadek Pwuhk en Pahr en 2002 (2002 Yearbook of Jehovah’s Witnesses) oh ngehi kanekehla ni erein rahn siluh. I pahn nda me e kangoangeiehda laud, oh kakehlahda ahi pwoson.

“I pil wadek (research) nan Kahn Iroir (Watchtower) oh Awake! makisihn kan, oh I pwuriamwei laud! I wadekehr makisihn pwukat kaukaule erein pahr tohtohsang 15, ahpw I sohte ese duwen kangoang oh kaperen me oaralap akan kin kihda. Ire pwukat audaudki diren limpoak​—irair ehu me sohte rek nan rahn pwukat. I diarada mehkoaros me I anahne.”

Pwuhk Sarawi mahsanih: “Siohwa kin karanih irail akan me kin loalohla; oh irail akan me kin ahneki ngenen pahtou e kin kapitala.” (Melkahka 34:18, NW) Uhdahn met mehlel pwe irail koaros me “loalohla” de “ahneki ngenen pahtou” kak diar kangoang oh koapworopwor ong ahnsou kohkohdo sang nan Paipel. Sounkadehdehn Siohwa kan kin kihong aramas akan pwuhk, brochure, makisihn oh tract kan me kin kawehwe iren Paipel akan pwehn sewese irail akan me mie arail anahn.