Pilada Mour Soutuk

AHNSOUWET aramas ahneki elen pilipil tohto sang mahs. Karasepe, kitail kin pilada soangen likou me kitail men likawih, mwenge me kitail men kang, iawasa kitail pahn doadoahk ie, oh iawasa kitail pahn mour. Nan wasa tohto nan sampah, aramas akan kak pil pilada ihs me irail pahn pwoudki. Ahpw, Paipel kihda pilipil ehu me kesempwal sang pilipil koaros​—pilipil me ritidahng aramas koaros.

Pwuhk Sarawi mahsanih: “Ih me kin kesinenkihda teng wia dahme pwung pahn mourla, ahpw ih me kin pwakipwakih dahme suwed e pahn lelohng pein ah mehla.” (Lepin Padahk 11:19) Oh Sises Krais mahsanih: “Oh iet mour soutuk: aramas akan en eseikomwihla, me komwihte Koht mehlel, oh pil esehla Sises Krais me komw ketin poaronedohr.”​—Sohn 17:3.

Ei, atail Sounkapikadao ketin riting ong kitail ahnsou mwahu en pilada ahl me pahn imwikihla mour soutuk! Dahme kitail anahne wia pwe kitail en kak alehki mour soutuk?

Nin duwen me Paipel kasalehda: “nan elen me pwung mie mour.” (Lepin Padahk 12:28) Kitail kak iang kisehn irail me pwung ko me mih nan elen mour soutuk. Iaduwen? Sang ni atail pahn tehk kanahieng pwe atail mour en kin pahrekiong kupwuren Koht oh sapwellime kosonned akan. (Madiu 7:13, 14) Eri, kitail en wiahda pilipil pwung oh ale sapwellimen Koht kisakis en mour soutuk.​—Rom 6:23.