‘Solomon Sohte Kapwatada Duwehte Wahn Rohs Pwukat’
ROHS en nan mohs akan duwehte me mih wasaht iei duwen me kalap mihmi ni keilen ahl akan nan Africa (palieir en Africa). Eden rohs pwukat iei “cosmos” oh irail pil kin rek nan wasa karakar akan nan America. Soangen rohs lingan pwukat kak katamandohng kitail sapwellimen Sises kaweid. Pali moron en irail me wie karokaronge ih wia aramas semwehmwe kan oh irail kin kalap ngoangki arail anahn en war oh kanarail mwenge oh arail likou.
Sises eri keinemwe rehrail: “A mehnda kumwail pahn pwunodki likou? Kumwail kilang kiopw en nansapw akan ar kin keirda; re sohte kin doadoahk, re sohte kin pein wiahda ar likou. A I ndaiong kumwail pwe pil Solomon, nan eh kepwehpwe mehlel, sohte mwahn kapwatkihda likou kaselel ehu duwehte apwoat irail.”—Madiu 6:28, 29.
Soangen madamadau tohto me pid uhdahn mehnia soangen wahn rohs en nan mohs me Sises kin ketin kupwukupwure ni ah ketin wia sapwellime karasaras. Sises eri doula oh karasahda kisin tuhke kis me rek mehlel oh mahsanih: “Koht me kin ketin kapwatahda dipwen nansapw akan—dihpw me mie rahnwet a e kin mengila lakapw oh lekdekiong nan kisiniei; eri, ia duwe, e soh pahn ketin apwalih kumwail mwahu sang e kin ketin apwalih mepwukat, oh ketin kalikawihkumwailda? Kumwail meid pwoson tikitik!”—Madiu 6:30.
Edetehn wahn rohs “cosmos” sohte kin wia wahntuhkehn Israel ieu ahpw e kin sewesehda mwahu padahk me Sises songen wia. E sohte lipilipil ma ke kilang wahntuhke wet sang wasa keren de wasa me doh, e uhdahn lingan, oh irail sounmahlen oh sounkilel akan kin kalap wiahda kilel en wahn rohs wet pwe re linganki. Ni mehlel, Sises sohte ketin kalaudehla sapwellime mahsen ni a ketin mahsanih: “Pil Solomon nan sapwellime lingan koaros sohte kapwatada duwehte wahn rohs pwukat.”
Dahme kitail kak sukuhliki sang met nan rahnwet? Irail akan me papah Koht en uhdahn wehwehki me E pahn ketin apwalih irail en ale dahme irail kin anahne, pil lel ni ahnsou me keieu apwal. Sises ketin kawehwehda: “Kumwail rapahki mahs Wehin Koht, a soahng teikan koaros [duwehte mwenge oh likou me kumwail anahne] e ahpw pahn kin ketikihong kumwail.” (Luk 12:31) Ei, kapai mehlel kin kohsang rapahki Wehin Koht. Ahpw, ke ese dahkot Wehin Koht oh dahme e pahn wia ong aramas akan? Sounkadehdehn Siohwa kan pahn perenki sewese iuk en diar pasapengpen peidek pwukat sang nan Pwuhk Sarawi.