“Aramas Riemen Letelet Ni Aht Wenihmwo”

“MET keriau en sounpahr mwurin pahtou laud ah lelohng kiht pwehki mehlahn nait kisin serepeino.” Met iei tepin audepen kisinlikou ieu me ntingda nan nuhspepa me ede Le Progrès nan Saint-Étienne, France.

“Mélissa sounpwong siluh oh ahnekihda soumwahu apwal trisomy 18. Ke sohte kak uhdahn manokehla soangen soumwahuwo oh pil mehla me kin wiawi pwehki soumwahuwo oh met kin likamwete kasapahrekihpeseng aramas. Mendahte aht tikida wia Kadolik kei, se kin ahnsou koaros medemedewe ‘Koht, ma komwi mie, dahme kahrehda komwi kin mweidohng soahng pwukat en wiawi?’ ” E sansal mwahu me nohno menet me ntingihda kisinlikou kiset sohla ah koapworopwor oh pahtou laud. Nah kisinlikou doula oh koasoia:

“Mwurinte mwo, aramas riemen letelet ni aht wenihmwo. I mwadangete kasawihirahda me ira Sounkadehdehn Siohwa kan. I medewehdahr me I pahn ngihl kadek oh ndahng ira en kohkohla, ahpw I kilangada brochure me ira kihkihselio. E kin pid dahme kahrehda Koht ketin mweidohng suwed oh lokolok en mihmihte. Eri, I lemehda mweidirahlong pwe ien kasalehiong ira dahme ira kamehlele me sapwung. I leme me ong me pid nsensuwed, ngehi oh ahi peneinei pil pahn duwehte aramas teikan me undahn pahn ale lokolok laud wet oh se rongehr kawehwe kan me duwehte ‘Koht me ketikidohng kumwa serepeino, oh Koht me ketikihsang.’ Sounkadehde kan mihmi rehi ekis daulih awa ehu. Ira rong ahi koasoi oh inenen poakeiehla oh ni ara pahn mweselda, ahi pepehm inenen saledekla oh I pil men ira en pwurodo mwurin met. Met wiawi sounpahr 2 samwalahro. I saikinte wiahla emen Sounkadehdehn Siohwa, ahpw met I kin onop Paipel rehrail oh nantihong iang towehda mihding koaros me I kak.”