Sapwellimen Koht Kupwur Me Pid Duwen Me Mehlahr Akan

MEHLAHN kompoakpatail emen kin wia mehkot kaweikek. Pepehm en me solahr katepen soahng teikan, de loaloid, oh sehsehla dahme kitail en wia kin inenen laud oh kitail sohte kak nda uwen laud. Ni ahnsou me emen mehla, e kin kahrehong aramas me poakpoake ih en pehm me irail sohte kak wia mehkot, pwe sohte lipilipil ma aramaso kepwehpwe de manaman, sohte mehkot kak wiawi pwehn kamourada aramaso.

Ahpw, Sounkapikpatail sapwellimaniki wehwehpen mehkan me weksang douluhl ahn aramas. Pwehki E ketin wiahda aramaso sang ni pwelpar, E pil kak pwurehng kapikada aramas mehlahr akan. Pwehki kahrepe wet, Koht kin kupwukupwure me mehlahr akan duwehte irail wie momour. Sises mahsanihki duwen irail ladu lelepek kan en kawao me mehlahr: “Ong Koht irail koaros wie momourte.”​—Luk 20:38, footnote.

Ni ahnsou me Sises ketiket nin sampah, e sapwellimaniki kehl en kaiasada me mehlahr akan. (Sohn 5:21) Kahrehda, e kin iang sapwellimaniki soangen wehwehohte me Semeo kin sapwellimaniki ong irail akan me mehlahr ahpw lelepek. Karasepe, ni ahnsou me kompoakpah Lasarus mehlahr, Sises mahsanih ong sapwellime tohnpadahk kan: “I pahn kohlahng kapirada ih sang ah meir.” (Sohn 11:11) Sang ni ahn aramas wehwe, Lasarus mehlahr, ahpw ong Siohwa oh Sises, Lasarus wie memeir.

Pahn sapwellimen Sises kaunda en Wehio, pahn mie “kaiasadahn irail me mwahu oh me suwed.” (Wiewia 24:15) Mwuri, irail oko me iasadahr pahn ale kasukuhl sang rehn Koht oh pahn kak alehiong irail irair en ahneki mour soutuk pohn sampah.​—Sohn 5:28, 29.

Ei, mehlahn kompoakpatail emen kin kahrehda pahtou oh pwunod, me kak reireiki sounpahr kei. Ahpw, medemedewehki irail me mehlahr akan nin duwen sapwellimen Koht kupwur, kak wahdohng kitail kamweitpen loaletail me laud oh kak kadirehkin kitail koapworopwor.​—2 Korint 1:3, 4.