Ni Ahnsou me Inou kan kin Wia Inou Tengeteng

POADOAPOAD kin direki inou likamw akan. Wehi kan kin kalap kauwehla inou kan me re kin sainipene me re sohte pahn uhpene, oh met kin kahrehiong neirail aramas akan kin mahwenda. Ehu ahnsou Napoleon nda: “Koperment akan kin kolokol arail inou kan ihte ma irail idihiong wia met, de ahnsoute me e pahn mwahu ong pein irail.”

Ah iaduwen inou kan me emen emen aramas kin wiahda? Ia uwen kalingeringer ahnsou me aramas emen sohte kin kolokol ah inou​—⁠ni mehlel ma aramaso emen me ke ese oh likih! Ahpw, mehlel, aramas akan pahn ele sohte kak de sohte men kapwaiada arail inou kan.

Ia uwen wekpeseng me mie ong ahn aramas inou oh sapwellimen Koht inou! Sapwellimen Koht inou kan kin mehlel oh likilik. Sohte lipilipil inou kan me Siohwa Koht wiahda kin wia inou tengeteng. E uhdahn pahn pweida. Aiseia 55:11 kin kasalehda duwen sapwellimen Koht mahsen me kin mehlel oh pweida ahnsou koaros, oh mahsanih: “Ih pil duwen mahsen me I ki kapwilewei​—⁠e pahn kin kapwaiada audepen kupwurei koaros; e pahn kin kapwaiada mehkoaros me I anahne en pweida.”

Eri, iaduwen atail en medemedewehki sapwellimen Koht inou kan me kileledi nan Paipel? Kitail uhdahn kak likih inou pwukat. Karasepe, wahnpoaron Sohn ntingihdi: “Iet tehnpas en Koht rehn aramas akan! E pahn ketiket rehrail, oh irail pahn wiahla sapwellime aramas. Pein Koht pahn kin ketiket rehrail oh e pahn wiahla ar Koht. E pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek. Soahng mering kan sohralahr.” (Kaudiahl 21:3, 4) Ke pahn paieki soangen kapai pwukat ma ahmw mwekid pahn pahrekiong mahsen en Sises kan: “Oh iet mour soutuk: aramas akan en eseikomwihla, me komwihte Koht mehlel, oh pil esehla Sises Krais me komw ketin poaronedohr.”​—Sohn 17:3, NW.