“Ke Dehr Kasapahrekihpeseng”
DUWEN ahmw kak kilang nan kilel wet, kamel emen oh kouwol emen me wahpene mehn deipwel tehieu sohte soanamwahu ong ira koaros. Moangen dompiki (yoke) me pire irapene—me kin wiawihda ong mahn riemen me soangen wehtehieu oh soangen kehlail tehieu—kin kahrehiong mahn riemen (kamel oh kouwol) en apwalada. Pwehki sapwellimen Koht kupwure kamwahupen soangen mahn pwukat, Koht ketin mahsanih ong mehn Israel kan: “Kumwail dehpa kapatapene kouwol emen oh ahs emen ni doadoahk en deipwel.” (Deuderonomi 22:10) Soangen kaweidohte pil doadoahk ong kouwol emen oh kamel emen.
Nin duwen me kin kalap wiawi, soumwet emen sohte pahn kihong soangen kahpwal duwehte met ong nah mahn akan. Ahpw, ma sohte nah kouwol riemen, e pahn pirepene mahn riemen me mie reh. E sansal me iei met me soumwet en nan senturi 19 me mih nan kilel wet pilada en wia. Pwehki wekpeseng en mahn ako—wekpeseng ara toutou oh uwen paliwarara—me luwet rehra pahn ahneki ahnsou apwal en pwakipwakih me kehlailo oh me kehlail rehra pahn pil pwangada urahdeki me luweto.
Wahnpoaron Pohl doadoahngki karasaras en wisik sapahrek pwehn padahkiong kitail mehkot kesempwal. E ntingihdi: “Ke dehr kasapahrekihpeseng wisik iang me soh pwoson. Pwe soangen werekpene dah me aramas pwung men oh aramas suwed emen ahnekipene? De soangen ehupene dah me marain ahnekihiong rotorot?” (2 Korint 6:14) Iaduwen Kristian men ah pahn kak wisik sapahrek?
Ehu ahl met kak wiawi ma Kristian emen pilada en pwoudikihda aramas emen me sohte iang kamehlele dahme e kin kamehlele nin duwen pelien lamalam. Soangen ehupene wet pahn apwal ong ira koaros, ni ara pahn sohte kak pwungkipene ire kan me wia poahsoanen ara irair en momour.
Ni ahnsou me Siohwa tepiada koasoandi en pwopwoud, e kihong ahn liho pwukoa en “kaitar” de “kaunsekpen” ah pwoud ohl. (Senesis 2:18) Ni soangen ahlohte, Koht doadoahngki soukohp Malakai oh kasalehda me lih pwopwoud duwehte “werek.” (Malakai 2:14) Sounkapikpatail kupwurki pwopwoud ehu en pelikidpene ni soangen kaweid en ngehn tehieu, oh ehukihpene katoutou kan oh dolung kamwahu kan ni soangen wehtehieu.
Ni ara pahn pwopwoud “ihte rehn Kauno,” Kristian emen kin kasalehda wauneki kaweid en Samatail nanleng. (1 Korint 7:39) Met kin wiahda poahsoan mwahu ong patpenehn pwopwoud ieu, me kak imwikihla kaping oh wahu ong Koht nin doken ira koaros kin papah Ih ni ara ‘wisik pahrek’ nan irair ehu me tohrohr.—Pilipai 4:3.
[Credit Line]
Kilel en kamel oh kouwol kohsang pwuhk me ede: La Tierra Santa, Volume 1, 1830