SampahPahn Saledeksang Mwersuwed Ni Ahnsou Kohkohdo

Medewehla, ma ke kak, sampah ieu me sohte aramas mwersuwed! Pahn sohte anahnpen polihs, imweteng kan, oh koasoandi en kopwung me inenen apwal en wehwehki iangahki pweilaud. E pahn wiahla sampah ieu me emenemen pahn wauneki aramas teikan oh ahr dipwisou kan. Met duwehte auramen me mwomwen sohte kak pweida? Ke kak ahneki soangen madamadau wet, ahpw wekidekla mwahu wet kin wia inou ieu me kohsang Pwuhk Sarawi. Dahme ke soh tehk dahme Pwuhk Sarawi kohpada duwen dahme pahn wiawiong mwersuwed oh suwed teikan en sampah wet?

Nan pwuhken Melkahka, kitail wadek: “Ke dehr pwunodki aramas suwed kan. Ke dehr peirinki paien irail me wiahda sapwung. Re pahn mwadang sohrala duwehte dihpw me pahn mengla. A me aktikitik kan pahn sapwenkihla sahpwo, oh re pahn paiamwahu oh popohl.” (Melkahka 37:1, 2, 11) Mehlel, sohte me kak kauhdi Koht sang kapwaiada inou wet oh pil inou kangoang teikan.

Sapwellimen Koht ahl en wahdo soahng pwukat koaros iei sapwellime Wehi. Nan Kapakap en Kauno, Sises Krais padahkiong sapwellime tohnpadahk kan en kapakapki Wehi wet en kohdo oh kupwuren Koht en “wiawi nin sampah duwehte nanleng.” (Madiu 6:9, 10) Ni ahnsou keren, pahnangin kaundahn Wehin Koht, sohte emen pohn sampah pahn men wiahda mwersuwed pwehki semwehmwe, kahpwal kan, oh roporop. Weksang met, Mahsen en Koht kasalehda: “Reken wahn pilawa pohn sampah; e pahn kipehdi pohn dohl kan.” (Melkahka 72:16) Ni mehlel, Siohwa Koht pahn ketikihong aramas koaros nin sampah soahng mwahu kan kohkohlahte. Ahpw kesempwal sang met, aramas koaros pahn mwekidki limpoak ong Koht oh mehn mparail, oh sohlahr pahn pwurehng kedirepwki mwersuwed.