Kahrepe Irail Kin Iang Sarawi
“NAN wehin Korea, irail kan me kin iang sarawi tohtohsang irail kan nan America me kin iang sarawi pahn pak pahieu.” Rohng wet me dierek nan makasihn en Newsweek wia mehkot kapwuriamwei ong me tohto pwehki irail kin kilangwong Wehin Korea nin duwen wehi ehu me aramas kin iang pelien lamalam en Confucius de Buddhist. Rahnwet, irail kan me kin mwemweitla nan wehin Korea, irail pahn diarada me pelien lamalam tohto me “Kristian” oh arail ihmw sarawi sansal pwehki lohpwu kan me wiawihkihda dengki poh weitahta kan kin mihmi powe. Rahn Sarawi kan: ke kak kilang aramas riemen de silimen me weuwa neirail Pwuhk Sarawi kan kohkohlahng sarawi. Nan pahr 1998, roporop ehu kasalehda me persent 30 en tohnwehio kin iang towehda mwomwohdisohn Kadohlik de Prohs, irail me tohto sang irail me dene re iang Buddhist.
Rahnwet, e inenen kapwuriamwei en kilang me tohto sohte lipilipil iawasa kin iang towehda sarawi kaukaule. Kaidehn nan wehin Korea te, ahpw met kin wiawi nan wehin Aiseia teikan, me iangahki Africa oh Latin America. Dahme kahrehda aramas tohto kin kasalehda me re kin kamehlele Koht mendahki aramas tohto sohte kin perenki wekpeseng en pelien lamalam kan me kipehdi sampah? Dahme kahrehda irail kin iang sarawi?
Roporop ehu kasalehda me tohto sang elep en tohn sarawi en Korea kan kin raparapahki popohl en madamadau; silikis ehu raparapahki mour soutuk mwurin mehla; oh emen sang nan me ehk raparapahki koapworopwor en roson mwahu, kepwehpwe, oh pweida mwahu.
Aramas tohto nan China kin iang sarawi pwen kak kaitarala arail anahn en pali ngehn me kin kohsang koapworopworki kaunda en capitalistic me wiliandi kaunda en communist. Pahr koaros, Pwuhk Sarawi rar kei kin wiawihda oh kohpeseng nan China, oh aramas akan kin ngoangki wadek Pwuhk Sarawi duwehte arail kin wadek kisin pwuhk weitahta me poahsoanda sang madamadau en emen ohl me adaneki “Mao.”
Soahng pwukat koaros kin kasalehda me, mendahki aramas tohto me kin kamehlele Koht, pali laud en aramas kin nsenohkihte dahme pahn wiawi ong irail ahnsouwet sang dahme pahn wia ni ahnsou kohkohdo de pil duwen Koht.