Koht Kin Ketin Kupwure Kitail?

KE KIN diar me ke kin nannanti nan pwunod pwehki apwal akan en nan ahmw peneinei, apwal en soumwahu, doadoahk, de pil pwukoa toutou teikan? Aramas tohto kin wia met. Oh ihs nan rahnwet me sohte kin apwalkihda palien kopwung sapahrek, palien kauwehla kosonned oh wiewiahn lemei? E kin mehlel dahme Paipel mahsanih: “Audepen lahng oh sampah koaros kin weiweirek, rasehng medek en neitik, lao lel ahnsou wet.” (Rom 8:22) E sohte kapwonopwon aramas tohto ahr kin wia peidek wet: ‘Koht kin ketin kupwure kitail aramas? E pahn ketikihong kitail sawas?’

Nanmwarki erpit Solomon mahsanih ong Koht nan kapakap: “Pein komwihte me inenen mwahngih duwen mohngiong en aramas akan.” Solomon likih me Koht sohte kin mwahngihete kitail aramas, ahpw pil kin kupwure emenemen kitail. Solomon eri kak peki rehn Koht en “ketin karonge sang nanleng” oh ketikihda pasapengpen kapakap akan en aramas me lahn Koht me kin wehkadahng Koht “pein ah apwal oh ah medekla kan.”​—2 Kronikel 6:29, 30.

Nan rahnwet, Siohwa Koht kin ketin kupwure kitail oh E kin ketin luhke kitail en likweriong Ih ni kapakap. (Melkahka 50:15) E inoukihda me e pahn sapeng kapakap en irail oko me kin kapakap sang nan mohngiong oh ahr pekipek kan kin pahrekiong kupwure. (Melkahka 55:16, 22; Luk 11:5-​13; 2 Korint 4:7) Ei, Siohwa kin karonge “kapakap koaros, pekipek en sawas koaros me kohsang rehn sapwellime aramas koaros.” Kahrehda, ma kitail kin likih Koht, kapakap oh peki sapwellime sawas, oh karanih Ih, kitail pahn kak pehm sapwellime epwel limpoak oh sapwellime kaweid. (Lepin Padahk 3:5, 6) Soun nting en Paipel Seims kamehlelehiong kitail me: “Karanih Koht, oh e pahn ketin karanih iuk.”​—Seims 4:8.