Dahme Kahrehda Sounkadehdehn Siohwa kan kin Pwurepwurehng Pwaradohng Komwi?

NAN sampah pwon, aramas kin ese me Sounkadehdehn Siohwa kan kin kaukaule kalohk sang ihmw lel ihmw. Ekei aramas kin men ese dahme kahrehda Sounkadehde kan kin kalapw kohkohdo rehrail, ahpw mehlel ma re kin mahs sohte kasalehda arail men rong dahme re kin padapadahki. Kisinlikou riau sang Russia sewese kawehwehda kahrepe.

Masha, serepein emen me sounpar 19 nan Khabarovsk wehkada met: “Ni lokaia mehlel, mahs, I kin tangasang Sounkadehdehn Siohwa kan duwehte irail soumwahu kamasepwehk.” Ahpw, mwurin Masha wadek ekei makisihn kan me Sounkadehde kan ntingihada, e wekidala ah lamalam. Masha koasoia: “Dahme I wadekada nan makisihn ko inenen kamwekid ai madamadau oh e wia mehn kamarain, ahpw me keieu kesempwal audepen makisihn akan kin wekidala duwen ahmw kin medemedewe duwen sampah. Ekis ekis I tepida wehwehkihda dahme kahrehda Koht ketikihong aramas en ahneki kahrepen mour.”

Sang ni kahnimw en Ussuriysk, mpen mwail 50 sang Vladivostok, Svetlana ntingihdi: “Met I ahpwtehn tepida wadek The Watchtower oh Awake! makisihn kan. Makisihn pwukat inenen anahn nan atail ahnsou. I kin pereniki wadek oaralap kan koaros. Re kin kamwekid madamadau, diren kaweid oh wia mehn kamarain. Kalahngan! Kalahngan ong kumwail ki amwail iang mih nan sampah oh pwehki amwail pil iang wia doadoahk anahn oh kesempwal wet.”

Sounkadehdehn Siohwa kan nan wasa koaros nin sampah, kin inenen kesempwaliki sapwellimen Pohl peidek me kin kamwekid laud medemedewen aramas me nda: “Iaduwen aramas ah kak karonge ma sohte me pahn padahk?” (Rom 10:14, NW) Ke soh uhdi mahs minit kei oh karonge Sounkadehdehn Siohwa kan ni ahr pahn pwurodo mwurin met? Ele pein komwi pahn perenkihda.