E Konehng Kitail en Kapakap ong Tohnleng kan Pwehn Peki Sawas?

Ekonehng kitail en kapakap ong tohnleng kan ni ahnsou apwal? Aramas tohto iei arail madamadau. Ni mehlel, pwuhken New Catholic Encyclopedia koasoia: “E konehng en kapakap ong . . . tohnleng kan . . . ahpw ni mwomwen ahl me irail pahn welian kitail mwohn Koht.” Eri, kitail en kapakap ong tohnleng kan en wia weliapatail?

Mahsen en Koht ketikihda ahd riaute eden sapwellimen Koht tohnleng lelepek kan​—⁠Maikel oh Kapriel. (Daniel 8:16; 12:1; Luk 1:26; Sud 9) Pwehki ahd pwukat kin pwarada nan Paipel, kitail kilang me emen emen tohnleng pwukat wia ngehn tohrohr kei oh mie adara, kitail kak kamehlele me met kaidehn ira mehkot kinekihda kei. Ahpw, tohnleng teikan sohte men adarail akan en sansal. Karasepe, ahnsou me Seikop idek rehn emen tohnleng en padahkiong ih ia ede, tohnleng kahng. (Senesis 32:29; Sounkopwung 13:17, 18) Sohte irekdi en eden tohnleng mih nan Paipel, kahrehda aramas sohte kak tamataman laud duwen irail.

Nanpwungen pwukoah kan en tohnleng kan iei en pakairkihong aramas mahsen en Koht akan. Ni mehlel, tepin lepin lokaiahn Ipru oh Krihk me kawehwehdi “tohnleng” kin wehwehki “sounkair.” Ahpw, tohnleng kan sohte kin wia sounkadoke kitail lahng rehn Koht me dene re kin wahwei atail kapakap ong mwoalen Siohwa Koht, Wasa Lapalahpie. Koht kupwurki atail kapakap akan en kohwong Ih, ni mwaren sapwellime Ohlo, Sises Krais. Sises Krais mahsanih: “Sahmo pahn ketikihong kumwail mehkoaros me kumwail pahn peki ni edei.”​—Sohn 15:16; 1 Timoty 2:5.

Siohwa Koht sohte kin nohn kedirepw me dene e sohte pahn kak karonge atail kapakap akan ma kitail kin pwarodohng Ih ni wahu oh kapehd mwahu. Paipel kamehlelehiong kitail mahsanih: “Siohwa kin ketin karanih irail akan me kin likweriong Ih, ong irail akan me kin likweriong Ih ni mehlel.”​—Melkahka 145:18, NW.