Dolepe kan me kin Patpene oh Wiahda Mour Werei oh Kaperen
“ARAMAS koaros kin men laudla, ahpw sohte emen kin men wia ohl de lih laudla.” Met wia koasoi pwoat. Aramas tohto kin kohkohlahng sounpar en retire kin kasikasik ahnekihda ahnsou laud ong pein irail, oh katikala arail pwukoa kan. Ahpw, irail kin perki me sohla wehwehn arail mour, oh sohla kateparail. Irail pil kin masak irail dehpa kelehpwla, sohla peren, oh soumwahula.
Eri, ia kih ong emen ahneki mour peren? Ahneki kompoakepah mwahu oh peneinei mwahu iei me kin sewese wahdohng me pwulopwul oh pil me mah kan peren laud. Ahpw, dahme aramas teikan kin wia pwe en wahdohng peren ong nan mour en aramas mah men kaidehn ih me keieu kesempwal. Dahme aramas mah men kak wiaiong meteikan wia mehkot inenen kesempwal ong aramas maho.
Roporop werei ieu wiawi ong pwopwoud mah 423 kasalehda me “wiahda sawas ong mouren aramas teikan kak sewese kareireila pein atail mour.” Stephanie Brown, me wia roporop, koasoia: “Roporop kadiarekada me kaidehn dahme kitail alehsang atail ehuiong meteikan me katapan, ahpw dahme kitail kihda ong mehteikan.” Soangen kihkihwei pwukat kin kak pid sewese meteikan nan ihmw, apwalih neirail seri kan, oh wia kisin doadoahk teikan ong irail, idan irail seli, de pil mwohndi oh rong irail me men koasoi ong uhk ah madamadau kan.
Mpen pahr 2,000 samwalahr oko, Sises Krais mahsanih: “Kihkihwei me kaperen sang ale.” (Wiewia 20:35) Ahl en ale mour soutuk oh mour peren sohte kin kohsang ni mwohni laud me wie nekinek nan pangk, de wini me pahn kapweiekihdi mahla oh paliwaramwahu. Ahpw, dahme kesempwal sang mehpwukat, kitail en kaukaule pwerisek oh kihda atail ahnsou, nanti oh kehl en sewese aramas teikan.
Ahpw, e pahn anahne laudsang kihda ahnsou oh kehl pwe kitail en pere kitail sang mahla, soumwahu, oh mehla. Wehin Koht kelepw me kak kihweisang soahng pwukat. Pahn kaundahn Wehio, soumwahu pahn sohlahr oh pil “mehla pahn solahr wiawi.” (Kaudiahl 21:3, 4; Aiseia 33:24) Ni mehlel, aramas peik kan pahn ahneki peren kohkohlahte nan paradais ieu pohn sampah. (Luk 23:43) Sounkadehdehn Siohwa kan kin inenen perenki ehukihong mehteikan kaweid en Pwuhk Sarawi me pid duwen mour werei oh mour peren.