“Se Men Nda, ‘Ei!’”

BRANCH Ohpis en Sounkadehdehn Siohwa kan nan Nigeria alehdi kisinlikou ieu ni ahnsou kerendo kan me koasoia mepwukat:

“Nait pwutak, Anderson, melahr ni ah sounpar 14. Mwohn ah mehla e apwalihada nah malek riemen. E men netikihla malek ko oh kadarala mwohni ong Branch Ohpis wiahki ah sawas ong doadoahk en kalohk me kin wiewiawi sampah pwon. Ahpw, e mehla mwohn ah kak netikihla malek ko.

“Pwehki at ese met, kiht, ah pahpa oh nohno, apwalihada malek ko oh netikihla. Met se kadarewei mwohni ko pwehn wia ahn Anderson sawas. Pwehki sapwellimen Siohwa inouo, se kamehlele me ahnsou keren​—inenen keren⁠—se pahn pwurehng kilang Anderson. Se men nda ‘Ei!’ ni ahnsou me e pahn idek ma se kapwaiada ineng en mohngiongio. Ni mehlel, se kasik sen kilang kaidehn Anderson te ahpw pil ‘pokon kalaimwun en sounkadehde kan’ me pahn iasada.”​—Ipru 12:1; Sohn 5:28, 29.

Nin duwen me sansal mwahu nan kisinlikouo, kamehlele kaiasada iei elen koapworopwor me kin kolokol Kristian mehlel akan. Ia uwen kaperen me peneinei million kei pahn ahneki ni ahnsou me irail akan, me duwehte peneinei en Anderson, pahn kasamwohdo kompoakpahrail akan me peselwei sang kitailehr pwehki atail imwintihti iei mehla!​—1 Korint 15:24-​26.

Mahsen en Koht ketikihong kitail koapworoapwor kansenamwahu wet en iasada en wia ehu kisehn soahng mwahu kan me ahnsou keren pahn wiawi nan sampah kapw me pahn mih pahn kaundahn Wehin Koht. (2 Piter 3:13) Pwuhk Sarawi mahsanihki dahme Koht pahn ketin wiahiong aramas akan ni ah mahsanih: “E pahn ketin limwihasang pilen masarail koaros oh mehla pahn solahr, pil solahr mwahiei, me sengiseng. Soahng kan en mahs solahr.”​—Kaudiahl 21:4, NW.