Iaduwen Ahmw Kak Powehdi Pahtou
KE KIN pahtoula? Nan ahnsou pwukat me peikasal oh uhpene kin mie, aramas tohto kin mworusala pwehki sohte arail doadoahk en mwohni. Ah ekei aramas mihmi pahn kahpwal en aksident. Ah pil ekei kin nannantihong powehdi kahpwal nan peneinei, ekei sang soumwahu laud, oh ekei pwehki arail kin loaloid.
Ma ke kin pahtou, iawasa ke kin repen sawas ie? Aramas rar kei nan sampah kin diar kamweitpen loalarail ni arail kin wadek Sapwellimen Koht Mahsen, iei Pwuhk Sarawi. E kin kamehlelehiong irail sang nan mahsen en wahnpoaron Pohl me mahsanih: “Kitail kapinga kalahngan en Koht, Semen atail Kaun Sises Krais, ih Samatail me kalahngan oh Koht me pwarer en kansenamwahu koaros. Ih me ketin sewesei kitail nan atail apwal akan koaros.” (2 Korint 1:3, 4) Ke soh wadek irewet oh pil iren Pwuhk Sarawi teikan nan pein noumw Pwuhk Sarawi? Ni omw pahn wia met, e pahn ‘kamweitala mongiongomw oh kakehleiukada.’—2 Deselonika 2:17.
Sawaspen pahtou kak pil kin kohsang ni omw pahn werekiong irail akan me kin papah Siohwa. Lepin Padahk 12:25 mahsanih: “Pwunod pahn kak adihasang omw peren, ahpw lokaia kadek pahn kaperenihiukada.” Ni atail kin iang towehda mihding en Kristian akan, kitail kin rong “mahsen mwahu,” me kin “kansenamwahu oh kamwahuwihala tih kan.” (Lepin Padahk 16:24) Ke soh iang towehda ehu mihding en nan ehu Kingdom Hall en Sounkadehdehn Siohwa kan pwe ken kak pein pehm soangen kakehlail me soangen pokonpene wet kak wiaiong uhk?
Ke pil kak ale kamwahu sang ni kehl en kapakap. Ma ke apwalikihda kapwunod kan en mour wet, ehukihong ahmw pepehm loal akan ong “Sounkaronge Kapakap.” (Melkahka 65:2) Siohwa Koht, Sounkapikpatail, wehwehkin kitail mwahu sang pein kitail kin wehwehki pein atail pepehm akan. Kitail kak kamehlele sapwellime sawas. Sapwellime Mahsen inoukihong kitail: “Mweidohng Siohwa omw kahpwal akan, eri e pahn ketin doareiukala; pwe e sohte kin ketin mweidohng me lelepek kan en lohdi.” (Melkahka 55:22) Ei, “irail oko me kin koapworopworki Siohwa pahn kapwurehdohng irail kehl.”—Aiseia 40:31.
Siohwa Koht kin ketikihong kitail sawas kehlail kan me kak sewese kitail en kak powehdi irair en pahtou. Ke pahn kin doadoahngki mehpwukat?