Kitail Pahn Kak Ahneki Saledek Mehlel Ehu Rahn?
SERI KAN kin peren oh mwadomwadong ong arail pahpa oh nohno—ihs me sohte perenki kilang soangen irair wet? Seri kan kin pehm saledek mehlel ni ahnsou me pahpa/nohno nsenoh kan kin mih rehrail. Ahpw, ong me pwulopwul tohto, soangen ahnsou kaperen duwehte met sohte mengei en ahneki. Weksang met, ekei seri kan kin pwunod ahnsou koaros pwe re sehse iawasa re pahn pweidi ie pwonget. Mie koapworopwor ong soangen seri kan me sohte imwarail pwukat oh pil aramas teikan me sohte kousoan ni saledek oh meleilei?
Edetehn ahnsou kohkohdo likamwete sohte kak wahdo mehkot mwahu, Mahsen en Koht kin kihda koapworopwor. Soukohp Aiseia kohpada me rahno pahn lelodo ahnsou me aramas koaros pahn kousoan ni irair en saledek. E ntingihdi: “Aramas akan pahn kauwada imwarail kan oh kousoanla loale—sohte emen tohrohr pahn kak doadoahngki. Re pahn wiahda ar mwetuwel en wain oh pahn kin nsenamwahuki wahn wain kan—ahpw sohte emen tohrohr pahn kak adihasang ar wain. Nei aramas akan pahn mour werei, rasehng tuhke kei. Re pahn nsenamwahuki mehlel dipwisou kan me re koadoahkihada.”—Aiseia 65:21, 22.
Ahpw, iaduwe—koapworopwor wet mie poahsoanpe? Ni mehlel, lepin lokaia “koapworopwor” sohte kin ahnsou koaros koasoakoasoia me e uhdahn pahn wiawi. Karasepe, nan Brazil, aramas akan kin kalap nda met: “A esperança é a última que morre.” Met wehwehki: “Koapworopwor kin mehla keieu mwurin mehkoaros.” Met wehwehki me aramas tohto kin ahnekihte koapworopwor pil lel ahnsou me solahr mehkot kak kadehde me mihmiehte koapworopwor. Ahpw, koapworopwor me Koht ieias ketikihong kitail kin weksang met. Wahnpoaron Pohl ntingihdi: “Mehmen me kin pwoson [Koht] sohte pahn sarohdi.” (Rom 10:11) Kokohp en Paipel akan me audepe pweidahr akan kin kamehlelehiong kitail me inou teikan koaros me Siohwa kin ketin wia pahn pil pweida. Ahnsou me inou pwukat pahn pweida, irair akan me kin siken lahng seri kan en koukousoan nanial akan pahn solahr.
Pil nan rahn pwukat kaweid konehng kan me dierek nan Paipel kak sewese irail oko me solahr arail koapworopwor en kak kamwahuwihala arail mour oh solahr koapworopwor en ahneki saledek mehlel. Iaduwen met a pahn kak wiawi? Sounkadehdehn Siohwa kan nan ahmw wasahn kousoan pahn perenki sewese iuk sapeng peidek wet.