Ihs me Pahn Kamwenge Sampah? N
IN DUWEN kendo me palien “World Food Programme” (prokram en United Nations ong kamwahuwihala duhpek) wiahier, dene aramas million pak 800—me pali laud seri kan—irail mihier ni irair en duhpek. Ni ahnsou kerendo kan, pwihn wet koasoia me tehtehk kan oh kautih me pali tohto en wehi kepwehpwe kan wiahiong irair wet kin salongkihla kahpwal laud teikan, me duwehte palien terrorism. Parpeseng en soumwahu lusulus akan pil kin kalaudehla apwalo. Nein pwihn wet ripoht me ede “Global School Feeding Report” koasoia duwen wehi kan nan Aperika, wasa kan me soumwahu en AIDS kin rek ie: “Dih en pahpa/nohno wet pwon kin mwadangete mehmehla pwehki soumwahu en AIDS. Seri kan me re mehsang kin pein raparapahki mehn ketihnain oh wasahn kousoan, oh pali laud en irail sohte ese wie mwetuwel, oh pil soangen koahiek teikan me dih en aramas akan kin sukuhlkihsang arail pahpa/nohno.”
“World Food Programme” kin kawekaweid pwe mwenge en kin wiawi, keieu malaulau, pak ehu nan ehu rahn nan sukuhl. Met kaidehn mehn sawasehdahte duhpek ahpw en pil wiahda ahnsou en kihda kasukuhl ohng kahpwal akan, pwehn kak irehdi HIV/AIDS rehn me pwulopwul kan.
Nan wasa kan me koasoandi wet wiwiawi ie, seri kan ale mwenge, ale kasukuhl en kamwakele paliwar, oh sawas teikan. Re diarada me wasa kan me towe kan wekidala ahneparail ohng arail tiahk kan doupeseng en HIV/AIDS tikitikla.
Meid kapahtou pwe dahme kin kohsang koasoandi mwahu kan en aramas kin mwotomwot oh sohte kin unsek. Ahpw, inou kansenamwahu kin kohsang nan Paipel me pid kamwahupen atail kahpwal akan ong duhpek me pahn poatopoat. Melkahka 72:16 mahsanih: “Reken wahn pilawa en kin wiewiawihte nan sampah.” Pahn kaundahn Wehin Koht, aramas akan pahn kakehr patohwan ohng Siohwa Koht: “Komw ketin kasalehda omwi kupwure sampah ni omwi kin ketin kalamwurehki keteu; komw ketin audehkihla wahnsahpw oh pwehl mwahu. Komwi ketin audehda piletik kan; komwi ketikihong sampah wahntuhke kan. Met iei wiepen nin limomwi kan.”—Melkahka 65:9.
[Credit Line]
WFP/Y. Yuge